ادينا رأيك بصراحة؟ المتزوجون لا يمتنعون

حليل موسي وحليل زمن صباه يا حسين لكن قلت احصل الباقي ونتفادى اخطانا الوقعنا فيها نحن وناس موسي ...ونحصل الشفع ديل بدري ونخارجن ...
لكم الود

اهلي الزينيين ازيكم
والله ياشباب انا بعتبر مداخلة اخونا وعمنا حسين ورد الخالة من اجمل التعليقات في هذا الموضوع .......
رايكم شنو نعمل جائرة لاجمل مداخلة ....

بس يا محمد احمد بطل زحلقة البوست دا خاص بالزواج الجماعي ..والجوائز حتكون للذين سبقو بالتسجيل واجمل عريس وعروس بعد نهاية الحفلة والجمال هنا لا يعني الخلقة بل اشياء كثيرة..نحجز ليك نمرة؟
تخريمة..تعليقك دا فتل البوست عديل كدي

احيي الفكره والصحيح في رايي ما ذكره الاخ ايهاب : بت فاهمه زايد اسره واعيه وولاة امر يريدون الستره..... هذا بعد التحيه والاحترام للجميع

لك التحية يا مجتبى والله وكلام ايهاب عين الحقيقة
احجز ليك ؟
قول لي تشوفي في الفيل تطعني في ضله

السلام علي من اتبع الهدي

والله عاد دا كلام جميل جداً يا د.الحسينابي وياعمتنا ويا بابكر ، ودحين انكربوا ياعزابة ولا تجيبوا رخوة .
يا خال اعتقد انو كشف التسجيل عند العمة، وأنا بقترح عيد الفطر موعداً لهذا الزواج الجماعي والموضوع مطروح للتصويت .

تخريمة : يا عمتنا باقيلي كورة التنس دي بعد دا فنيها في السلة

ابشر يا عمار اوافق على الاقتراح..الكورة دي حأضقل بيها كدي لحدي ما اسجل رقم عشرة ويكون هو البطل الحيدخل القون... باله هي تنس؟؟؟مش قلت ليكم ثقافتي الكروية صفر.

سلام يا شباب ..يا عمار عرفت البيليق ؟ هو زواج جماعي قام به كبار الحسيناب في فترة ما كان فيها احجام عن الزواج من قبل الشباب زي حالة اليومين ديل كدى والكلمة بتعني (الذي يليق) وكان بدون مشورة الشباب وتم عقد قران جميع شباب الحي وهم في ذلك الزمن كانو ناس ود عمر وابوي حسين وماشابه ذلك ..والغريبة في الموضوع كل تلك الزيجات لم تستمر الا ثلاث منهم وهم

1/حسين سعيد وفردوس بت عبيد
2/محمد خير محمدو فردوس بت مصطفى
3/ود عمر فردوس بت يس

أرجو من أهل التراث التصحيح ان كان هناك خطأ
لكم الود

اخوتي و ابنائي سلام الله عليكم
اعتقد ان ذلك الزواج تم علي يد السيد(عبد الوهاب الانصاري سنة 1916 ومن الزيجات التي استمرت ايضا ابوي عبد الباقي و امي حرم.... كانت فردوس تلقب ب(حمامة) و هو توجيه قول ابوي حسين سعيد في مدحته المشهورة(الهي للحج نسوق حمامه) و رد عليه حاج ود عمر محتجاً علي الانفراد بحمامة و مدافعاً عن حقوق الاخريات (يا الرسول انا لي اخيات**الرضيي و عينة جارات....وكان يفترض ان يتزوجها عبد اللطيف ابراهيم... و لذلك خرج مغاضباً سنة 1916 و لم يرجع للحسيناب الا سنة 1976.... و زواج فردوس هذا اول زواج تصنع فيه البنينه و تغني.....كان حدثاً....كذلك كان يفترض ان يتزوج (ود بلة) ب(فاطمة بت ابراهيم)و سبقه اليها محي الدين علي عيسي من الجابرية..
مع بالغ و اكيد احترامي

اخوتي و ابنائي سلام الله عليكم
اعتقد ان ذلك الزواج تم علي يد السيد(عبد الوهاب الانصاري سنة 1916 ومن الزيجات التي استمرت ايضا ابوي عبد الباقي و امي حرم.... كانت فردوس تلقب ب(حمامة) و هو توجيه قول ابوي حسين سعيد في مدحته المشهورة(الهي للحج نسوق حمامه) و رد عليه حاج ود عمر محتجاً علي الانفراد بحمامة و مدافعاً عن حقوق الاخريات (يا الرسول انا لي اخيات**الرضيي و عينة جارات....وكان يفترض ان يتزوجها عبد اللطيف ابراهيم... و لذلك خرج مغاضباً سنة 1916 و لم يرجع للحسيناب الا سنة 1976.... و زواج فردوس هذا اول زواج تصنع فيه البنينه و تغني.....كان حدثاً....كذلك كان يفترض ان يتزوج (ود بلة) ب(فاطمة بت ابراهيم)و سبقه اليها محي الدين علي عيسي من الجابرية..
*** البنينه (سيره ) تصاحب طقوس الحنة تغنيها النساء او الرجال حسب الحالة...يترنمون بها في الزواج و الختان..حين(خت الحنة) وحين الضريرة و لحظات الباس الاطفال العراقي الجديد للختان .....اما بنينة النساء التي نظمتها امي عاشة عبيد في زواج فردوس ذلك : يابنينا هوي بنبنبين يا بينا نحمد ربنا الحقق جديد دخرينا يا بنينا هو ي ...(اقلب يا لسان بي فاقة جيب الليلا شيبون المجمر دلوا بالتحويلا ماهو ضهب تجار دق الحداديد ديلا....شتيلة خالك الرطن الدباس فوق شيلا ما دلاها امس و الليلي قام ماشيلا... شال في امو الجديد حتين يحاسبوا عميلا ....يا بنينا هوي......و هكذا...!!! اما بنينة الرجال فهي مزيج من المديح النبوي من حيث الموضوع و السيرة من حيث زمن الاداء و مكانه و تصلح لان تقال في ختام المناسبات في مجتمع الرجال و البنينة المشهوره عندنا انشأها حاج ود عمر (اليوم الرجال حزموا الجمال للشيلا طالبين الحبيب في روضتو ام قنديلا.....ساءلك يا كريم مولانا شد الحيلا ذاك العام قرب و الحجة جانا بديلا......
و اشهر بنينا انشأها رجل من الشايقية لقب نفسه ب(خادم الفكي) امعاناً في التواضع و كان يؤديها احمد حاج الماحي(اللهم صل علي الرسول الغالي ود عزة قريش صاحب المقام العالي....) وتشترك جميعها في قافية اللام و حروف المد لسهولة انشادها بلا ايقاع....... و الله اعلم.. مع بالغ و اكيد احترامي]

e="عمار محمد"]السلام علي من اتبع الهدي

والله عاد دا كلام جميل جداً يا د.الحسينابي وياعمتنا ويا بابكر ، ودحين انكربوا ياعزابة ولا تجيبوا رخوة .
يا خال اعتقد انو كشف التسجيل عند العمة، وأنا بقترح عيد الفطر] موعداً لهذا الزواج الجماعي والموضوع مطروح للتصويت .

تخريمة : يا عمتنا باقيلي كورة التنس دي بعد دا فنيها في السلة
يا عمار يا خوي (السلام علي من اتبع الهدي دي) معناها اعلان الحرب.....علي من وجهت له هذه التحية....دحين انت قاصدا نحضر نفسنا للعرس و لا خانك التعبير زي ما قال عمنا عوض فرح.......؟؟؟؟؟




زز

الاستاذ الحسينابي الاصل(لانه في زول داخل باسم حسينابي عجوز ) مداخلتط اعطت البوست نكهة خاصة .. بتقصد شنو بنحضر نفسنا للعرس دي؟؟ ..شكرا علي توضيح التاريخ لزواج البيليق لكن انت متأكد من حرم المدينة دي كانت معاهم ؟لانها كانت بتحكي لينا وقالت هي وامي السهوة كان بيرمن في قراريص العقد وكلما يسمعن زغرودة يقولو عقدو لي فلاني ما واحدة منهن هن يبيبين..

عاوزين رايك وتعليقك علي موضوع الجماعي المطروح في البوست
لكم الود

بمناسبة اهمامي بالزواج المبكر يا شباب انقل ليكم هذة الطرقة من موقع سودانيزاون لاين لاحد كتاب البوستات الممتعة هناك اسمه(معاذ حسن) ووجدت هوى في نفسي ..الى القصة(
هواجس التقدم في السن لا تبرح تراودني... وبصراحة شديدة كانت أحد الأسباب التي دفعتني (فجأة) للزواج بعد تردد دام سنينا عددا..بعد أن تزوج جميع الأصحاب وأبناء الدفعة وأنجبوا البنين والبنات.
في ليلة العمر... كنت بيني وبين نفسي أعلم إنني أتزوج على كبر..وأعلم ان من بين المهنئين من يقول في نفسه( بالله شوف دا بعد شاب دخلو الكتاب,,,
ومع ذلك..حاولت في هذه الليلة المميزة ان أطرد هواجس التقدم في العمر وأن أصبغ عرسي بصبغة شبابية...ظاهريا لم أجد صعوبة كبيرة في ذلك حيث إنني من النوع (الحجيري) أي الذي لا تعكس ملامحه عمره الحقيقي ومع قصة شعر شبابية وبدلة سوداء وشوية كحل(أي والله الكحل الواحد دا) بدوت في ليلتي عريسا شابا يافعا ...ومرت الامور بسلام واقيمت الافراح والليالي الملاح (بحلة ود العقيد) حتى صدقت الكذبة التي أطلقتها وطفقت أرقص مثل الطيرا فرحا في رياض العاشقين والمغني الذي استجلبته يجاريني في كذبتي و يصدح (جاهل صغير مغرور في أحلام صباهو ...وعريسنا يا ود السرور جبت الشيلة والرفدور ) ويستطرد في أغانيه ممجدا شخصي الشاب الوسيم...حتى خيل اليّ انه يتحدث عن شخص آخر وليس شخصي الضعيف الذي اعرفه اكثر من جوع بطني..

في غمرة هذه المشاعر الشبابية لمحت كهلا أحدبا يبدو في منتصف الخمسينات قصير القامة مكرمش الملامح أشيب أشعث أغبر بفعل السنوات الطويلة التي لا شك مرت على وجوده في هذه الدنيا ...لمحته يحاول ان يشق طريقا وسط الزحام الى العريس الفرحان الذي هو أنا ليعبر لي عن مشاعره في ليلتي هذه,قلت في نفسي يا الله ..انظروا الى هذا الكهل... لعله أحد الأعمام لأقترب منه فلا استطاعة لهذا الشايب لمدافرة ومعافرة الجكس المحيط بي .دنوت منه... فعانقني بقوة ثم فتح فما قد خلا تقريبا من الأسنان ولغلغ بكلام فهمت منه انه يبارك لي ,,,تمتمت ...الله يبارك فيك يا حاج ..تمعنت في ملامحه عن قرب فلم يبدو لي انني قد رأيته من قبل,,يا للذاكرة الخربة عشر سنوات في الغربة جعلتني أنسى أقرب الناس,,لا بد ان هذا العم من الاقارب او الجيران وإلا لما تكبد عناء السهر وجاء ليشاركني في فرحتي,,ولكن من يكون ...قطع العم أفكاري- التي يبدو انها قرأها- بأن جذبني يدي الناعمة مرة أخرى بيده( الحرشة ) مثل زردية قديمة مصدية ولغلغ في أذني بذات الفم الخالي تقريبا من الأسنان...انت ما عرفتني يا عريس والا شنو؟!!! قالها وهو ينظر اليّ وإبتسامة توحي بكثير من الثقة والثبات تكسو شفتيه..ويبدو انه قرر إلا يرحل إلا بعد ان يعرفني بنفسه فقد تأبط عصا كان يحملها وأخذ يصفق بكفية ويتمايل بشتارة واضحة مع الموسيقى الصاخبة المنبعثة في الارجاء ..يا الله من يكون... من يكون...فجأة لمعت صورته في ذهني ..تذكرته ..كنا نراه ونحن أطفال راكبا حماره الأخدر رائحا وغاديا في شوارع البلدة..نعم... انه العم عوض السيد ..كيف نسيته؟ !!
لم يتغير كثيرا ..ذات الفم الخالي من الأسنان وذات الهيئة القديمة..هتفت بنشوة المنتصر ...كيف ما عرفتك يا عم عوض السيد!!
توقف (العم) وأخذت ابتسامته تتلاشي ..وانسحب وهو ينظر اليّ نظرة لعلها شزرة ..(لا اعرف ما هي النظرة الشزرة ولكنها تبدو شيئا كنظرة ذلك الرجل)..ولكن ماذا به؟ وما باله إنسحب هكذا,,نظرت الى من كانوا يتابعون ذلك الحوار من المهنئين فوجدت ذات النظرة الشزرة في عيونهم....الله!!؟...الحاصل شنو...همس أحد اشقائي في أذني ..يا زول عمك عوض السيد الله يرحمو مات ليهو سنين...والزول دا ولدو ربيع!!...كان صاحبك زماااااااااااان وقرا معاك زمان في الابتدائي !!!

دا قرأ معاي أنا ..دا ربيع زميلي...يا حول الله......لا أستطيع ان اقول اكثر من ان (العم ربيع) قد أفسد بعض ليلتي وأيقظ فيّ هواجس نجحت في كبحها لبعض الوقت في ليلة العمر,,, بحمد الله تعالى لم تفهم العروس شيئا من الدراما التي حدثت أمامها للتو...والا لطبّت ساكتة...ومن يومها وأنا أتحاشى معظم (الأعمام) الذين درسوا معي المرحلتين الإبتدائية والمتوسطة في (حلة ود العقيد). )
ماداير اخوفكم لكن القصة عجبتني شديد...طبعا اولادنا الاتربو في الجزيرة بتكونمرت عليهم
لكم ودي

تحياتي
اما تاريخ الزواج الجماعي فقد اخذته من ابوي حسين شخصياً ايام الفيضان سنة 1988 و هو يشكو من كثرة الرحيل لا فوق و لا تحت بسبب البحر..1917-1937-1946-1954-ثم 1988 و كذلك زواج امي حرم... و قصة (حمامة)و فاطمة بت ابراهيم من خالنا عبد الرحمن يس... ومعها قصيدة سيروا بها ود بلة(مكاوة)لا ذلت ابحث عنها..وهو نفسه اكد لي زواج امي حرم...و لكن تظل صاحبة الشأن ادري بنفسها مافي شك..و المسألة تحتاج لعدة اتصالات بالخالة خادم الله و لم انجح في الاتصال بها منذ الساعة3م

تحايا للشامخين ..

يا عمار انت مالك كاتب عيد الفطر بالقلم الاحمر ؟ مجرد سؤال

عمتنا قالت زواج البيليق نجحن فيه )الفراديس بس ( اللهم ارزقنا بالفردوس في هذا العرس الجماعي ..

يا عمتنا انتي لو مصره علي اكتبيني نمره حداشر ..

انتو الفيل ده منو ؟؟؟؟؟

ود واحترام مستدام

سلامات الواثق ..مالك اللون الاحمر دا هجمك كدي ؟وهذا اللون دليل على اهمية الموضوع والله انت شايف غير كده؟ان شاء الله ربنا يديكم فردوس الدنيا والاخرة..ماعندك مانع 11/الواثق من نفسه الصادق الذي لايكذب اهله (المشكلة اسمك براه بيربطك)..
بالله الفيل ما عرفته؟ بالنسبة لمجتبى تفتكر يكون الفيل منوووووووووو؟

لكم الود

الخالة العزيزة السلام عليكم ،،،،،
طبعا نمرة واحد عمار ، احدعشر واثق ، انا عايز نمرة( سبعة ) رايكم شنو ؟

انا قلت حداشر لأنو العرسان عشره .. واللون الاحمر لخمني حقيقة ..

يا الواثق انت من زمن عشرة ؟الكشف حصل 25 .. فعلا اللون الاحمر بلبش القلبو خفيف ..براحا على الشباب يا عمار دودرن بشيشي..يا محمد احمد نمرة سبعة دي حجزتها واحدة..لكن عشان ما تنط شاورتها وقالت ما عندها مانع تبدل ..
7/محمد احمد عبدو..
يلا املو الاماكن الشاغرة العيد قرب
لكم الود

آل دهمش سلام
يا الحسينابي ماشرط تجهز نفسك لكن ساعدنا ادفر ليك كم نفر كدة من العزابة ديل وان درت العرس انت ذاتك اقرأ آية التلفت .
يا واثق بعد دا النطة شينة فدحين اركز آا جنا .
محمد احمد سلام نحييك بقيت احسن من الواثق ، بعدين انت مالك سمعتك دي "غتست" كدة؟؟؟
يا عمتنا حا نعمل ليهم ضو اخضر ...
أهل الاختصاص قالوا دي كورة سلة ( ولدك ياهو القادي كورة يا عمتنا) ...

الود والسلام

آآناس ما عصرتو علي لكن انا لسه صغير وداير اقرا عشان كدي بحول ملف القضيه لي مجتبي واعتبروه الفيل وضل الفيل محل ما دار تطعنو اطعنو (توكيل شرعي يا مجتبي ) بعدين نمره سبعه ديل ناس الواسطات والا شنو والا يكون في واحد من الاخوان تحت تحت دفر البنيه ...



‏ الاحترال

والله يا الواثق غلبتني عديل كدي لكن حأجيب ليك واسطات ..يا بابكر ما تقول للراجل دا شي..انا غايتو حارفع التوكيل للمحامين للتوثيق ولمجتبى للتوقيع ولو رفض التوقيع ابقى شيل شيلتك بس ما براك ونمرتك في مكانها ويادار ما دخلك شر..

يا عمار...كملوا الكلام و كملوا الكتابة ..و في النهاية نحن عارفين الداير يعرس منو و البحمس في الطار منو....و الحمد لله قالوا الردحي الردحناه دا كلوا حيلحق امات طه و يفتحولنا صفحة جديدة......
اما بخصوص عرسي انا....ف..(يعرس ركبيك)...انا قصدت نجهز حالنا لي عرسكم انتو.... اسأل ابو الحاج...نحن تاني الزينا دا العرس عندهم زي التمر الاصفر تعاين فيهو و التمرة طويلي.....ان بقي قدرت تطلع التمرة بتجيبو....و ان بقي عجزت ما بيكون فاتك شي...التمر بينجض و بيلاقيك في الواطة...
الكلام الناس البنقزو برة الدارة.....زززز
تخريمة : مصادر الدعم المعنوي و مصادر الدعم المادي...و الله و تالله تاني ما بتلقوها ...كنكشوا في الفرصة دي.. و الزول كان راجل كان مرة بمسكو من لسانو...
مع تحياتي.....