ادينا رأيك بصراحة؟ المتزوجون لا يمتنعون

الاخوة والابناء الكرام لكم التحايا قدر رمال البار سابقا وقوز الكضابة .بما اني عمة الجميع واكبركم سنا في المنتدى اكيد امركم بهمني شديد.. عاوزة اطرح عليكم سؤال..ماهي متطلبات الشاب او الشابة لاكمال نصف دينه او نصف حياته الباقي؟ يعني بعربي بابكر كدي عشان الواحد يعرس متطلباته شنو في زمنكم الصعب دا؟ فهمونا حاجة يمكن نعمل ليكم زواج جماعي....

العمه والخالة العزيزه علوية سلام من الله عليك ورحمه منه وبركات بخصوص سؤالك عن متطلبات الشاب لاكمال نصف دينه في هذا الزمن وللشباب الفي العشرينات ديل اعتقد انو اهم اربعة حاجات اتنين : بدايه من وظيفه تعينه في معيشته وبيت يسكن فيه وهذه هى الاساس علي ما اعتقد والباقي دة بيجى تباعا زي اختيار الزوجة ومايتبعه من متطلبات

اولا قول عمل لمصدر الرزق وما تقول وظيفة لان الوظائف بقت عشم ابليس في الجنة..اما البيت دا كان راجيهو واطاتك اصبحت ياكا بقيت متل القبالك وعرست فوق الاربعين..نحن عملنا بيت بعد 25 سنة زواج انت دايرو من قولة تيت؟متطلباتك صعبة يا جنا خفف شوية

تسلم ايهاب وشكرا للمشاركة متطلباتك مقبولة ومنطقية وماصعبة المنال كدا بتحصلنا في الجماعي ان شاء الله

شنو يا مهند؟؟ تتاوق مالك؟؟الطب هد حيلك والله شنو؟ ادينا رايك يا دكتور اجتماعيا وطبيا في الزواج المبكر

بعد السلام انت قلت المتطلبات وهذه هي المتطلبات اما اذا اراد اى شخص ان يتزوج بدون اى مصدر رزق وبدون بيت فممكن ونماذجه كثيره ففى النهايه هى مساله قناعه بالعرس في تقديري ولكن انت سالت عن المتطلبات لاكمال نصف الدين وهي التي ذكرت انفا

يا ابني مااختلفنا هي اساسية لك ما ترجاها لانها قاتلة للزمن

السلام عليكم وحمه الله العمه علويه مرحب حبابك فى منتداك الشموخ . ما فى شك فى اهميه الزواج المبكر والتجارب الحسينابيه اثبتت نجاحه . المشكله انو الشباب والشابات ما راضين بى واقعهم . البت دايره ليها عريس عندو بيت وعربيه ووظيفه مرموقه ودى لى زول شاب مستحيله . والولد لو ما كان عرسو زى عرس فلان داك ما بيرضى . واهل البت اول حاجهة بسالو منها عندك بيت، شغال شنو، فالمشكله مركبه وكبيره .لازم كل الاطراف كان البت او الولد او الاهل فوقهم كلهم يقدموا تنازلات ودايرين نعمل زواج جماعى بى وليمه واحده المانع شنو.
استرنا يا سابل الستر احفظنا من عرس الزمن
اختنعوا بى شيتا قليل خلو البنات يتعرسن

العمه العزيزة جدا علويه بنت ابن عوف سلام
اشكرك جزيل الشكر لطرحك لهذه الموضوع الهام جدا
والذي يخص شريحة الشباب . كما نتطلع ونترقب ردود
لهذه الموضوع قويه تأتي ثمارها .
اما بخصوص متطلبات الشاب لإتمام نصف دينه
يقول الامام الشافعي :
إذا اصبحت عندي قوت يومي فخل الهم عندي يا سعيد
ولا تخطر هموم غدا ببالي فأن غــــدا له رزق جديد

عندنا نحن في الحسيناب امثله كثيره للزواج المبسط فكانت الوالدة ربنا
يحفظه تحكي لنا كثيرا عن زواج خالي المرحوم عبد الله عبد الرحيم
كم تمنيت ان يكون مثله مبسط
اما متطلباتي
* اوضه وبرنده ولو إيجار بس اهمه شي تكون مفروشه تمام
* متطلبات المناسبه من ماكولات ومشروبات + شوية مصاريف في يدك
*الباقي قوة قلب بس
تعريجه :
يا مهدي البيت هين الكلام البنيان انا شان ابني الحوش ومطيبخ
مصارين جيبي انقطعن
سنلتقي ان شاء الله في نفس التاريخ المتفق عليه في يوم الجمعه
الموافق 11 / 11 / 2011
ودمتم شامخين

عمتنا سلام

موضوعك شيق جداً
وبيني وبينك كدة ، كل متطلبات العرس تتلخص في "دقة سدر" وبس .

سلامي

العرس هين الكلام بعد العرس

يا عمة الناس دى كلها والله موضوعك فى الصميم وشكلو وقع للناس دى فى جرح
مشكلة الشباب وحسب شهادات موثقة من ناس بعرفهم القروووووش
الواحد بقول ليك ياخ انا طالما حدفع كم مليون شيلة وكم مليون شبكة وكم مليون عشاء وصالة....الخ
وطالما عندى القروش دى كلها
اعرس لشنو؟ ما خلاص اسافر ولا اعمل لى حاجة مفيدة وبعدين العرس ملحوق.
صراحة العرس الزمن ده بقى كابوس وفى نماذج كتيرة لى ناس اتزوجوا زواج بذخى جدا وهم حتة يدخلوا فيها راسهم بعد العرس ده مافى...وغالبا الزيجات الزى دى ما بكون عندها مستقبل الا من رحم ربى لانو فى الحالات دى الزواج بكون مظهر اجتماعى اكتر منو حياة لى قدام.
وربنا يسهل عليكم كلكم انشالله

دكتور مهند كلامك صاح لحد لكن متل ماقالو اخوانك كلها تهيبات ساكت بس دايراها قوة قلب وركزة قوية ودقة سدر(صدر)لكن بيني وبينك الهيلمانة الوحدة بتعرس لالف ..ولقدام

الابن احمد نور سلام كلنا زواجنا كان مبسط لدرجة قف... ولحدي اليوم خالك لمان اقولو دايرالي توب لعرس فلان يقولي هو انا في عرسك ما جبتلك توب اجيبو ليك لعرس فلان..وكلام الرسول(ص) تزوجو فقراء يغنيكم الله من فضله ما تتنسوه...بالنسبة للمتطلبات ارجو ان تكون مفروشة وبس بدون تمام اما المأكولات دي قلنا جماعي تور واحد بس بكفي ابقي عشرة على مصاريف الايد وقوة القلب

يا بابكر بطل مقابضة قلنا المتزوجون ديل رايهم بس ...الدبيل دا خلو بعد نعرس للشباب بعدين بنديك الفرصة الاولى

يلا يا عمار دق شديد ونحن معاك حديد...اصلها هيبة العرس دي فقاعة صابون كبيرة تنفجر بنهاية الحفلة ترش المعازيم وتدخل للغريش في عيونو...

معليش العريس كتبت غلط انا قاصدة تدخل للعريس في عيونو

يا عبد الرحيم الهند كيف ان شاء مبسوطين انت ومصعب فعلا العرس هين لكن بعدو اهون منو

يا نون مسألة الصالة والفنان دي ما محسوبة عندنا نحن بنتكلم عن الاساسيات بس وان دعت الضرورة اولاد ود حليب قاعدين ...قلنا جماعي جماعي ما تلخبتو

طبعا يا ايهاب غلطة كبيرة ترك امر الزواج للابناء دي ...انا في رأي دي مسؤولية مباشرة للاباء
وأي ام او اب عندو ولد او بت فات سن الثلاثين ما معرس المفروض يشيل همو ويمرق من حقو

السلام والرحمة والبركات

أنا داير ادق سدري شديد ياعمتنا بس اليومين دي عندي شوية نزلة كدة .
وبعدين الصابون البيدخل في العيون دا زاااااتو ياهو المخوفنا .

خارج النص : لو جماعيكم دا فيهو ملالين سجليني أول واحد في الكشف .

سئل ذات مرة عالم رياضيات عن المرأة.. فأجاب إذا كانت المرأة ذات (خــلـق ) فهي إذاً تســـــــاوي = 1 وإذا كانت المرأة ذات(جمـال) أيضــاً فأضف إلى الواحد صفراً = 10 وإذا كانت المرأة ذات(مـال) أيضاً فأضف صفراً آخـر = 100 وإذا كانت المرأة ذات(حسـب ونسـب) أيضاً فأضف صفراً آخــر = 1000 فإذا ذهب الواحـد (الخلق)... لم يبق إلا الأصفار... إذا فهي (لاشيء)... اها يا اولادي يكون منطلقنا للعرس الجماعي دا كلام عالم الرياضيات دا... والصابون يا عمار مشكلتة محلولة..كيس مناديل ورق بجنيه وتكون في امان الله بس بشرط ما تخلي الحاجة تتقل ليك الكحل (بضم الكاف)ساعة الجرتق...وكان للنزلة القرض رااااااقد نخرتو ليك من شدرة ابوي سعيد بي بركته كمان ...بس لقدام.... وعمتكم موجودة لايجاد الحلول لكل المشاكل المعقدة...تسلمو