[size=24][b]عبدو اتلحلح[/b][/size]

ياعبدو اتلحلح واتدردح لا ياخدك زمنك زندية
الدنيا دروبا بتتشربك ما بتمشي وحاتك دغرية
الواحد بالنفس الواحد ينهيها الهسع مبدية
وبعدينك يمشي ويتوكل شان يبقي يشوف الفي النية
بكراك في قلمك وكراسك في هذي الكتب المنسية
والخير في عافية ضرعاتك بالحكمة تقوقي القمرية
الزمن الهادر لو فاتك الخطوة بتتعب في الجية
وتلقاك ما طلت القدامك وخليتا وراك الطورية
واحلامك ديك وامالك واماني الناس العذرية
حا تصبح همك ومأساتك وفي هذي الدنيا الكونية
لابد من صدرك يتحمل للريح المهماها قوية
ولابد من قلبك يتشمل بالقيم الصبحت مرمية
ووحياتك اوعك تتجمل ورينا سجيتك وبالنية
ولابد من كلك تتكمل وتتنسم معني الحرية
وتتعلم تحيا عشان فكرة وتستشهد من اجل قضية

****************************************