[size=18][b]وطنا احد[/b][/size]

وحلفنا بالخلقك ممدد فينا عشقا للابد
لا بتتقسم لا بتترسم جوانا بي خطا مشوه يا بلد
رغمت انوفا ما لقت في تربتك عطرا ينسيها الشهد
شلت كفوفا....
ما تصفق لي جناتك
لما كان شالوه ذاتك
في عيونن وشان هناتك
ركبو دربك يا سلامة المهما طال بلقولو حد
نتشايلك......
والمابشيل شيلتك يشيل في جيدو حبلا من مسد
همك سوا بنتقاسمو ولو كان هو مخلوق في كبد
نيلك يعلمنا الشموخ والحكمة واللين والجلد
حيلك معاي يا كل زول في هاالتراب ضهرواتسند
في كسلا في ام درمان نيالا وفي جوبا ورومبيك وحلفا وابوحمد
ما طال ما زال الضراع الفيك اخدر يا ولد
ما طال كم طال الصراع والفينا حر وما برد
ارجوك خلاص افتح شراع الليلة بكرة وكل غد
واتناسي ماضيك اللي ضاع طال بينا والله الامد
لا متين تبتقي يا حروب..
من مافي تتلم المنافي
الحاجة فلهمة الخواجة
الراجي مأساة الملاجي
الجوع وقطرات الدموع لا بتروي لا بتشفي الرمد
ايدك نتكن بذرة الحلم الحلال داخل رحم هذا البلد
صوتك معاي....
ننشد اهاديل الحمام
نعزف علي وتر السلام نحلم نشوف خيرنا الرقد
نقفل خشم باب اليباب والاحتراب
الما جنينا وراه غير قبض السراب
وجحافل الموت والخراب والعيشة ابدا في نكد
وحلمت بيك.............................................
وطنا...... يشيل جنياتو لا من لااذي
وعلما يرفرف اعلي من هامات نخيلنا واعتي من كل المكايد والخزي
هرما... يدرسنا الشموخ يكتل جوانا المستحيل بالمعجزة
ورقما ....نفايلو علي الزمان صعب الامم تتجاوزا
والما..... تشيلو جتتنا زي ام الجنين فرحانة بي ومتلذذة
وهمما.... تزاحم في السحاب حب الوطن هو البشحذا
وعجما عرب زنج وحلب نوبة وبجا ونتصافي آه يا حبذا
وتتعافي كل الالف الف الفي قلوبنا مطرزة
وآمنت بيك...................................................
واحد موحد في الزمان
تتهز لا
تتلز لا
تتأز كيف
نحن بنعاند فيك شيطان العناد
نحن بنساند ديمة ختاتة الزناد
ونحن بنحبك وانت فينا قضيه لي يوم التناد
اهو شعبك الدغري الاصيل للوحدة ناداه المناد
اهو داك جون في شندي في وسط النخيل
وادروب جبنتو تداوي في غرب البلاد
وطمبور ينقرط سامعو جوة قطاطي ياي
واسحق هناك رفع الهلب لوحبو ليك
لبيك وسعديك والمهج تلقاها دايما بين ايديك
تلقاها لا مكرية لا مشرية حرررررة تغني ليك
وانا ياني لا بتكمل حروفي ولاانعقد ضهر الكلام القلتو فيك
انك احد...
وطنا احد..
شعبا احد..
وامالنا فيك ما ليها حد
واحلامنا فيك بلا عدد
وننسج حبال البال طوال ممتدة مد
لمن نشوفك وااافي كي ومتاااافي كي
ومتصافي عطبرة في رهد
متصافي سوباط في رهد
متصافي قاشا في رهد..................

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$