من اشعار الاخ مجتبي الصادق 2002 سنة

من طرف monntaser fadul الجمعة أبريل 02, 2010 2:15 am

اصارع فيك مواريثنا وقيمنا وكل تقاليدنا
اجاريك ام اجاريها واسيبك وانسي كل ريدنا
قيمنا الديمة حارسانا معلقة قاعدي فوق جيدنا
نشوفا كما قوانينك وبرضو نشوفا زي سيدنا
وما بنقدر نقولا بغم عليها ولا بنمد ايدنا
منو السناها ما معروف اهم شى انو حتفيدنا
حنفضل في محيط داير بحرنا ونخلنا وبيدنا
نقب اللوبي والسبروق نجيب في الوقفة قش عيدنا
نجيلق موية المشروع يجينا غفيرن المخلوع
يهنق هو وحمارو يجيك صوتو من اول المربوع
غرامتو لحدي ما تحصد شقاك الاصلو كان مبيوع
يكون جات ضعف اتعابك واضعاف قشك المزروع
تجوط انت وتفور تزعل
تجدع عدتك تنعل
ابو كل الغفر من جم تمسكا من دا في المشروع
توصلا للهناك قاعد دخولك ليه شي ممنوع
غفيرا ليه غفرا كتار خبيرو من البلد مقطوع
وتحلف بالذي خلقك انك تانى مهما تجوع
لا تزرع ولا تحصد ولا للواطة ترضي رجوع
لما عليك يحول الحول وتبدا زراعة الواطا
تلملم عدتك تنزل سريع لاحتي تتباطا
تحاول تلحق المسرة تصلح امورك الجايطة
تلاقي اسيمك المسكين معلق برة في اليافطة
انو هناك دايرنك لانك قطعتك ساقطة
تدخل في دهاليزن مروقك تاني بالواسطة
غايتو بعد تضيق خلقك
رويحتك تبقي في حلقك
تجيك ياداب تقاويك
بعد ما شربو من عرقك
وتزرع تاني في المشروع نفس غفيرن المخلوع
نفس الماضي يتكرر
تقد الموية تتسرسر
مصيرك نفس عمن اول
تجوط انت وتفور تزعل
تجدع عدتك تنعل ابو كل البيرضى الذل
ابو كل الرقد في الشوك عشان يلقالو رحراح ضل
علاجك يارضي وطيب تسل سيفك في وش الكل
وتعلن حربك الشعواء علي الراحة وطعيم النوم
علي الدنيا وفساد القوم
وعلي الكتلو القيم حيات في ناس حوا ناس كلتوم
صبرنا الفينا ذاتو نفد
لانو الصبر ذاتو جريمة لما يفوت خلاص الحد
نكورك ما يجينا الرد حتي صدانا ما بيصد
منو البقدر يعيش مظلوم وظلم القربة قالو اشد
منو التسمحلو نفسو يقيف مع رغبات وطن في الضد
منو البقدر يوقف ثورة عزها شعبنا الممتد
منو البقدر يجابه ثورة كان المولي ليها سند
سنن خنجلرك يا ود
واركع للاله واسجد
واسال ربك الاوحد
سلام ياشعبنا الاسعد باذن الله حا تسعد
بدورك يا وطن تمتد
نشرك جوة اعماقنا ونحسبك انت اقوي بلد
نغنيك وتغنينا ونشيلك جوة عينينا
تفيض بالخير وتستاسد
علي الدايرك ينوش عرضك علي اليلمس يهين ارضك
وبي طولك وبي عرضك تكون انت الجحيم والنار
وتكون انت النعيم برضك.................