طـينـــــــة

للشاعر اشرف الصادق

التربة المخلوق من طينه ربنا قدر سواها
في الازل السابق اسطر مقدورها ويوما ومنفاها
غناها الزمن المتسابق متجاهل قدرها دساها
في عمق الماضي المتوغل متولولي دايما تلقاها
متمنى تعاود من تانى انفاسها البلغت مثواها
شان سمعت انك ولدوك فوق ضنب الدنيا العضاها
دار تمسك ايدك بي ايدا البعد البينكم صداها
اعصابا انهارت في اللحظة دمعاته انزرفت بالاهة
كلماته اتمجت في العبرة واللهجة اتلكنت في فاها
الا الشايف غير السامع فهمت الداير جواها
بالوش الناطق في صمتو والحكمة العمت دنياها
لملمنا النضم المتناثر من بين الالم المساها
جمعنا حروفو وكلماتو الجملة اتضحت معناها
من فوقا انعنون عنوانا وصية امك اقراها
باسم الله القادر يبعثنا من بعد الحقب العشناها
يابنى انا كنت داير اوصلك قبل الروح تفرض راها
متناسى العشرة البينا انبرمت خلت جسمى وراها
يعالج فى السكرات ويوصى عل التاريخ يحكى صداها
وتبلغ اذنيك في زمنا عبد الدنيا وزكاها
وخلط الحابل بالنابل وانقلب السافل اعلاها
والقيم انداست وانجرفت مالاقت زولا واساها
غير ناسا عمرها متهالك واوان القدرة اتعداها
ماسكين في ذيلا وجاراهم راجين المدد اليلفاها
يابني اتشمر واتزود في ذمة دينك ترضاها
الحق ابواتك شد ايدن دعوات امك تلقاها
في ظلم الليل المتقدم تكشفلك دربك تتباهي
انوار الحق البتضوى من قلب الام الوجاهه
داساها حجارا من بدري لي حوج الزمن الجهجاهه
خابراها الدنيا وعش فيها مسكين اليقصد يبراها
غشاش التيه الماليها وتياب الزينة اللابساها
اوعاك ان يخطر بي بالك
في يوم تتملك ارجاها
معليش عارفاك وراك مصالح كلمات امك لاتنساها
وختاما عملك لو كان صالح بيلحق امك يغشاها
ومعقول الوالدي المحتضرى بتنسى الولد البراها
من دعوة تصلح مشوارو شقيش ينزح يلقاها
اماه الزمن الجوانا ودانا اطرافا واقصاها
معدومة هناك شريعة الله منعول ”“““““
الناس تتنافس شان تجرم شايفنها قمة منهاها
متحير ولدك في الحاصل وحدانى مربع فوق اهه
متشتت فكرو ومتضارب تسنحلو الفرصة وياباها
مرات يتسنط دقات قلبو عشان تحكيلو ويوعاها
يلقاها تعلى وتتوطى تضرب فى جنبى وتختاها

اللهم ارحم اشرف الصادق واسكنه فسيح جناتك مع الصدقين والشهداء

وشكرا اخي مهدي ومنتظرين منك الكثير من قصائد المرحوم اشرق
خابراها الدنيا وعش فيها مسكين اليقصد يبراها
غشاش التيه الماليها وتياب الزينة اللابساها

اللهم ارحمه واسكنه فسيح جناتك يا ارحم الراحمين

آمين