عابرة (فى درب الغرام) للشاعر الحبيب

عابرة (فى درب الغرام)

أنتى ماك عارفى الصبر شيم النفوس المسلمه
ولا لا يانور العيون وقعة سهامك مؤلمه
اه انا من عيونك ومن سيوفا صارمه
يا عابرة من غير السيوف ليك القلوب مستسلمه
ساعة أرق فوق الورق تكتب حروفك وترسمه
والله يا منبع هناى بى سر جمالك ملهمه
خائف انا وشفقان من جور السنين القادمه
يا عابرة برتاح لما أعيد لحظات طفولتى الحالمه
فيها كان عاش الفؤاد زهرة عميرو الباسمه
يقرا ويعيد درر القصيد لى فــــــــاطمه
اه انا من زمانى ومن سنينى المظلمه
ومين يقدر يثور ثورة حنينى العارمه
قولة حبيب عاشقو القليب فى دارنا عيب ومحرمه
يا عابرة عادات الجدود ذات القيود المحكمه
اه انا من عذابى ومن مصايبى الدائمه
يا عابرة من دون الشباب زى السحاب متراكمه
رحلة عمل جمعتنى بيك والله ما كنت أحلمه
واه لمان تحين لحظة فراقنا القاتمه
أطوى الجروح داخل الضلوع اصبر عليها واكتمه
حتى الدموع لمان تسيل الغيرى تب ما بيعلمه
يا عابرة من بلدا بعيد لاقيت قبائل قادمه
شافوها فى لبس الحجيج بين القوافل محرمه
يا عابرة صالينى الهجير ما شفت غيمه مغيمه
يا عابرة من حظى التعيس حتى الرياح متأزمه
عابرة يا مفتاح هناى يا نور حياتى المظلمه
عابرة يا سلوى الحزين زينة بنات العاصمه
عابرة فى درب الغرام لاقيت مواقف مؤلمه
يا عابرة جرعنى الزمان كاسات حناضل علقمه
ساعة وداع لحظة نحيب فوقنا الشقاوه مخيمه
يا عابرة يوم دق الدليب من دارنا قامت فـــــاطمه
يا حلوه ما خليت بلاد سايقانى روحى الهائمه
رحلة عذاب طالت خلاص يا عابرة وين الخاتمه