مدرسة الككر الأساسيه

من طرف mussab kamil الأحد يونيو 27, 2010 6:51 pm

الناس القيافه سلام

مازكرت مدزسة الككر الأساسيه إلا وزكر أستاذ (ود أحمد) أستاذ اللغه الإنجليزيه المعروف بل والمعروف جدا لبعض الطلاب ٠٠٠
كم من الطلاب تركو الدراسه خوفا من (الأحيمر) ٠
أعدكم بأن نفتح بوست خاص لهذه المدرسه وسنحكي فيه كل ماعلق بالذاكره من مواقف طريفه وحزينه ومفرحه أحيانا٠٠

السؤال هو:_
في أي عام تم تأسيس مدرسة الككر الأساسيه ؟
من هو أول مدير لها ؟
ومن هو أول فراش ؟

بجيكم صاد

من طرف بابكرمحمدخير الإثنين يونيو 28, 2010 8:34 pm

تأسست فى عام 1985 واول مدير لها هو الاستاذ عبد الوهاب موسى من اهلنا ناس حسينارتى وكانت فى ديوانا التحت والمدير نفسه كان يسكن فى بيوت امى فردوس بت مصطفى وهو الذى حكيت عنه فى منتديات اخرى بانه هو الذى قال للتلاميذ بابكر ده إلا تشكوه لى الله
لأنهم ذهبوا اليه يشتكون منى لأنى منعتهم من شرب موية ناس خجيجى الصاقطى وكانوا عندما يكوركو انهرم ومرات ازكهم لامن يمرقوا من الديوان
قال لهم الفصل ديوان ابوهو وجدو وانا زاتى ساكن فى بيوت حبوبتو عاد ما عندكم شى غير تشكوه لى الله
ولاحولة ولا قوة إلا بالله وما اعظم الجرم وما اقبح الجهل
رحمتك يارب ومغفرتك
التاريخ يا مصعب قد يكون مانى متاكد منو لكن حوله احوم كما حامت عمتى حول الحمى ولقت اسم البنيى

من طرف mussab kamil السبت يوليو 03, 2010 8:45 pm

الأخ بابكر الرجل الذي لايمل حديثه زي ماقال التوم٠

مشكور علي التوضيح وياها المحريه ٠

لكن شكلك كدي كنت معذب الطلبه عذاب جد، تحاحي فيهم من مويه خجيجي الساقطي دي طول النهار٠

والمدير طلع عاقل تب وكت قال للطلبه (الزول ده إلا تشكوهو لله)
ماعندو حل غير كدي _المدرسه في ديوانكم وصاحبك المدير قاعد في بيت حبوبتك ٠٠

التحيات الكتيري

من طرف بابكرمحمدخير الخميس يوليو 08, 2010 3:15 am

شكرا الدكتور الجاينا من ككتور يازول نجض شغلك تمام شان فاطنى ما تجى تباركلك التخرج ( الجماعه يباركو للزول مبروك يا دكتور التخرج
ألف ألف مبروك والقيامى قايمى لامن جات فاطنى قالت كدى نادولى الفحييحيص ده النباركلو )

اول فراش هو المرحوم عبدالرحمن عباس
أول مدير رسمى أبراهيم فضل

الشوق بالجداول

من طرف حسينابي عجوز الخميس يوليو 08, 2010 4:11 am

بابكر سلامات
المدرسة هذه الايام في حاجة إلى مراوح و لمبات كهربية و كراسي و ادراج للتلاميذ . و نسعى الآن لجمع و توصيل هذه الأشياء للمدرسة بمشاركة جميع الحسيناب و الخريجين دون اعتبار للون السياسي و يا حبذا لو يساهم المنتدى في دعم ذلك المجهود.
لك الود و التحايا

من طرف بابكرمحمدخير السبت يوليو 10, 2010 3:56 am

الحسينابى الكبير سلامات من الناصرية لى حى النصيف !!

نأمل ان يوفق الاخوة بالعاصمة ممثليننا فى الحيكومة من عمل شئ ملموس لهذه المدرسة

ونحن بدورنا بسوى البنقدر عليهو ان شاء الله

والسلام عليكم ورحمة الله تعالى وبركاته

مدرسة الككر الأساسيه

مدرسة الككر الأساسيه

رد: مدرسة الككر الأساسيه

رد: مدرسة الككر الأساسيه

رد: مدرسة الككر الأساسيه

رد: مدرسة الككر الأساسيه

رد: مدرسة الككر الأساسيه