قصيدة لشاعرنا الكبير مجتبي الصادق

ديباجة1

يا ناس السكن العشوائي يا أهل العافية الدراجة
جيتليكم شايل راكوبة احلامى جواها ومحتاجة
لي فرقة تفجها ببناتكم ما طال قلوبكم فجاجة
مترين دايرنها تتضاعف لا تبقى عماره ولا حاجة
بس تبقي حويطة تحمينا من ريح الدنيا وأمواجا
في الدنيا الواسعة ا لمنشرة ماسكين في دور الفراجة
تدهشنا مباني الاسمنت في الجو تتعانق أبراجا
أحلامنا الكانت ممدودة يوماتى نعيدلها إنتاجا
شان تصبح واقع وملموسة يومي بنتنازل عن حاجة
جوانا بساطة بتدهشنا ف الدنيا العندها سهراجة2
من نار العيشة وأسعا ألما باينلنا إفراجا
حامدنو القادر يدينا شاكراه قلوبنا وراجا
يارب ترفع لنا أيدينا من عوذ المخمصة والحاجة
من وجع اليد السفلية يا العالم وحدك إحراجا
يا ناس السكن العشوائي يأهل العافية الدراجة
الحلم اتقاصر يا سادة الأمنية صبحت ديباجة
والحظ يجدعنا محل داير قشتنا مطعمة سهاجة3
دايرين لنا حوشا يسترنا ضيفان حلتنا وأفواجا
يوم تنزل تنزل مرتاحة أعراف ترباتنا ومنهاجا
وأحلامنا الحلوة المشروعة شفعنا حياتنا وإبهاجا
دايرين لنا دارا تبقالم في بالم تصبح وهاجة
بي نور الحب الرباني في الدنيا الأمنية ديباجة
الخرطوم ..23\يوليو\2009