شوق وحنان وريد

شوق وحنان وريد
للشاعر علاءالدين ابو سير
رويان من قليبك يما شوق وحنان وريد
غرقان فى عفوك والله من ماقم وليد
يفضل فى القلب ذكراك مهما اكون بعيد
كل مازاد عفوك علىّ اقول هل من مزيد
ماسافرت أشان ارتاح اعيش هانى وسعيد
ولا هم العرس يايمه كان بيت القصيد
لا تقولى إنو فات خلاكى جافاك الوليد
شاغلاه المداين العايمه آسراتنو غِيد
ما بشغلنى عنك حاشا لا مال لا وليد
ولا بتمنعنى شوفتك يما اغلال الحديد
ما كان قصدى هجرك يما لما رحل بعيد
قصدى امسح دموع بالحسرة جارية على الخديد
لا تلومينى إن قصرت او إتأخر بريد
ما هو جفا السبب والله ما نسيان أكيد
بين اتنين وليدك يما بالو صِبح شريد
بين يرضيك وبين يا والده يرضى طموح عنيد
رضاك يايما كلو منايا وغاية ما اريد
تحقيق الهدف ما ببقى بالتمن الزهيد
يومي قليبى فى ذكراكِ يجترى ويعيد
طيفك ما ببارح لحظة حامينى الغميد
الله براهو عالم يما مشغول بيك شديد
ومنايا جنبك اعيش والله لو كان ليا ايد
لازم يما أنسيك الشجن واللوعة والفرح الوئيد
لازم تنسي زمناً فات وتعيشى زمن ولِيد
لازم كل تعبك فينى اتعبو فيك وازيد
ولازم اشيلا همومك وألبسك الجديد
دينك فوقى ما بتحلا لا يوم الوعيد
شبابى فِداكى وكان ما كفى ليك عمرى الوحيد
ما بتلهينى عنك دنيا وما بمسكنى قيد
ما إنتى الفرح والراحة والهوى والرصيد
ليكى سلامي ما محدود من الأرقام يزيد
عدد ذرات تراب الكون جبال وسهول وبيد
عدد ما أشرقت أنوار وطلّ صباح جديد
وعدد ما نسمة هبت باردى داعبت الجريد
كلو منايا تلقى العافية والعمر المديد
تفرحى بيا يوم الفال تباركيلى الجديد
يوم داك بالفرح نتباكى ونتقالد شديد
وتبقى الدنيا بسمت ليا وجات زى ما أريد
جاييك جايى لى عينيكى منها ما أحيد
ومنها نستمد الراحة ومنك نستفيد
ويتمدد فرحنا ويبقى عمرى انا كلو عيد
وفى حضنك أكيد للدنيا لون وطعم جديد