امي البتصحي من الفجر للشاعر خالد شقوري

امي البتصحي من الفجر
وتندلي لا عند الجرف
وتجينا لاعند الضهر
تفرش بشنتيقا وتجر
نما تمسربو الصبر
وقداما لوبيات خدر
وتقعد قصادن للعصر
لاحيلا كب تنهض تقوم
وبلاكسل توقد الجمر
وتجيب حليلتا دي الزمان
كانت تشد فوقها النذر
وتكرد قعيرا من الكرتب فيها عاد من تشر
وترمي البليلة وتزرودا
بي المي تب لامن تخر
وساساقا لاعند العشا لامن يأذن بابكر
وكتين خلاص تبقي استوت
ترميلا فيها هوين تمر
وتملا الصحين للحاج ابوي
دائما تقسم بالكبر
وتنده علي بت الخزين الحاجه امنا ام نصر
وتملا الكوريه وتخب لود علي الحامي العزر
ونحنا البطان
تملالنا عاد قدحا يمين ماشاف فقر
توقدلنا اللمبه ام ضنيب
وترميلنا تاني هوين تمر
وبلاوصيه نغرفو تب ونجغم المهيه ضر
ويغلبنا مانقدر نقوم
نافخين بطيناتنا السمر
فوقا السيايل والغبار
تنجارى من حد السدر
كاتل عويناتنا النعاس
نصل العناقريب بالجبر
امي البتصحي من الفجر
تلقاها لاعند الفجر
تنده علي سابل الستر
زيد الاجر
زيد الاجر
زيد الاجر

الله يزيد اجرها (لا فض الله فوك) كلمات معبرة بالحيل

مشكوره تسابيح علي القصيده الرائعة لذاك الرائع ومنتظرين اكتر واكتر من مشاركاتك
اشواقنا
عبدالرحيم محمدنور