كـــــــــــــنيـــــــــــــن محمد احمد الحبيب

كـــــــــــــنيـــــــــــــن
محمد احمد الحبيب
حبوبة يا مرت العدل .... حاشاكي ما لمتك انا
أنا جايي بي سراً قديم .... دافننو في بجبوج هنا
هاكي الجواب أقريهو بي تاريخ متين
شوفيني عديت كم زمن .... حايم أفتش في كنين
كل البنات الكانو في حلة سعد
لاقني راجعات العصير .... جابن جريد ما عندو حد
جارات مسابقات العجاج .... خايفات من الهوا والرعد
لكن كنين ما شفتها .... لا يبقى راحت للأبد
والحق كنين لا ريشة بتشيلا الهبوب
لا شالا سحار ود حمد
أنا متهم ناساً كُبار .... وبالذات كمان شيخ البلد
أنا متهم كل المشايخ من طرف
ضايف على ورق اتهاماتي العُمد
أنا ضد تقاليداً بقت .... في جيدنا حبلاً من مسد
وكل الظروف الفرتقت عش حبنا
هجرت أمانينا الزمان لامِن عليها الطين بنا
يا صمد ساقتنا ما لاقيت كنين
ارأف على حالتنا ما بيناتنا طين
همك مع طلب التمر وأنا في كنين
ظنيتا في درس العصر .... باريت دريب المدرسة
صاقر ولاد جابر براي .... لامن علي الليل مسا
درَّجت ماشي على البيوت .... أكلت فؤادي الوسوسا
سويتا قيرا مع البطان .... غنينا ود الزمزمي
يا شيخ عليك الله تجي .... يا زول تعال بي عندنا
إن درت بقسم لك عشاي .... وإن درت نضبح عنزنا
حسابنا كورك يا ولاد .... ما تمشوا سيبوا الشيطنة
قلنالو مبروك يا فلان .... ضابح أماني مع الخروف
جبنا الأباريق من نهار .... غسَّلنا إيدين الضيوف
قال ليَّ إنت ولد منو .... يا إبني لوحك في شنو ؟؟
جاوبتو والإبريق فضى .... أنا شافع الزمن المضى
أنا ضد تقاليداً عجاف .... رهنت حياة الناس هنا
حمَّر لي بي عيناً لهب .... طنطنت ما عارف خطاي
لزاني قالي قليل أدب .... ترتع وقعت على قفاي
وأديتوا في المليان شعر .... كلماتي فوقوا مدرنة
صيَّحت بي آخر حنين .... يا شافعة إنتي مشيتي وين
شالك حمار النوم متين .... أنا في رجاك كمين سنة
فتشت بعد في الودع ....كايس وجيهك ما اتلقى
طوطحت معلاق الفكر .... في خاطري صورة معلقة
قدام عيوني اندلدلت .... تشبه حبال المشتقة
خلتني عايش في شرود .... دايماً محدق في الفنا
مرحاتنا من زمن المحد.... ما شفت فوقن قينقرد
طولنا راجين الرهد .... يا قوزنا ليه بحرك شرد
رقدت مراكب في اليباس .... قلَّعت خايد باللباس
عيشك على مر الزمن مرمول ضنا
زارعِك أماني على الجروف .... نامت بامنيتي الظروف
من حجوة جمَّعت الحروف .... عديتا طلعت بالألوف
دونت إسمك بالعريض .... فاطني أم حجل يا بتنا
هبت نسايم الليل تسر .... دبت على ذكراك دبيب
مريت بي قبل العصر .... والقمرا مالت للمغيب
سامع بنات يتحدثن .... بارن خطايا يوسوسن
يومِن علي ويضحكن .... حصنت نفسي وفتهن
عصرن علي يتكلمن .... رديت عليهن طنطنا
رغم الفراق البينا طال .... صورة عيونك في الخيال
أرفع على دارك خطاي .... القاها غاصت في الرمال
عايش تحت إيدك سنين .... مطرق سنط شوقك مَتين
ضارب على مزمار حزين .... يوماتي متواتيك غنا
يا قمرة ارمي السنسني .... واجم علي زمناً دني
شوفيلي كيف أحوالا كيف .... قوليلا بالشوق منحني
عاينيلا لا غاية الليدين .... حاداني ولا محننا
قطَّع عصب صبري الحنين .... يا دنيا سعد الغابة وين
شلتيهو فد زول ما بكا .... محت المشاغل ذكرتوا
نبشت قوافي تربتو .... مدفونة وين يا سرتو
لو ما في زولاً في عقابك .... يا سعد ابكيك أنا
ابكيك بكايا علي شليل .... يوم شالوا تمساح الهموم
عاكف علي ليلاً طويل .... من طولوا ساهر بي النجوم
متمني ارجع زي قبيل .... طفلاً على الأحضان ينوم
يا دنيا سُب فوقك عديل .... ما طال خير ما بيدوم
أصحاب يمينك في اليسار .... واصحابك يسارك ميمنة
حبوبة كتري من حجاي .... حجيني زين لا تنعسي
شايل أحاجيك في غناي .... شيت الصُغُر ما بيتنسي
يا ريت كنين كانت معاي .... كانت تقولك ونسي
دايماً محلق في سماي .... تشكيل قواما الهندسي
راسم على ألواح شقاي لوحات جميلة ملونة
زي زيني قومي على عشاك .... أكليهو يلاكي المديح
الليلي عند الحاج فلان .... من بدري نبَّاهُن يصيح
باكر يسير الحاج فجُر .... أدمع على الخدين تسيل
يمشوبوا خلوة ود بدر .... يرتاح هناك يبدأ الرحيل
والليلي جيتك يا بلد .... لا خلوة فيك لا ميضنة
عارش بنا الأحلام ورود .... شربك جبابيدي العِرق
كسَّر سنانيري الصدأ .... والناس إمورا مقددا
وأنا زول عيونو مسهدا .... يا كاينا من يوم ما بدأ
طوالي ماشي بلا هدى .... ويتمنى يوم لقياك منى








ست الحروف الخمسه
الحبيب
يا صفق النبت لي شيخ يصين التربة
بالليل والنهار وابل سماك ما غبا
***
بروق الساري لما تسيل تحاكي فؤادي أنا الخفاق
رعود الساري لما تكر تحاكي صداكي في الأعماق
مياه الساري لما تسيل تحاكي دموعي إلا دموعي مابتنطاق
أنا الجاكي وأنا الشاكي وأنا الباكي وأنا المشتاق
***
أنا الشايلك شموع وأخفيكي لو ريح السمايم هبا
أنا الزارعك ورد وأسقيك دموع لو كان مطر ما صبا
***
أنا المستني شوفتك عملت المستحيل ومحال
أنا الرسلت اشعاري بعد صفيتا بالغربال
أنا الجنيت وأنا الغنيت كلام لا قالوا لابيتقال
وكتير فكرت واتحيرت في قصة شقاي الطال
***
يا صفق النبت لي شيخ حريص طوالي
بالليل والنهار وابل سماك متوالي
***
حكايتي معاك عميقة عميقة واصلة القاع
قصايدي وراك جروح مطوية ما إبداع
حياتي بلاكي ما بتنطاق ومشوار بي وراكي ضياع
ومظلوم كوني من بعدك معلم الله من إشعاع
***
حياتي معاكي شن بتقولي غير دمعاً غزير انكبا
أو زولاً مصارع الموج في بر الأمان ما طبا
***
يا ست الحروف الخمسة لمان تحذف التعريف من الإخلاص
حكايتي معاك سنين وسنين طويلة خلاص
حكاية زول مرق ما عاد واتخلطت دروب ما فرزا القصاص
أنا الحبيت عيونك ولسه ما شفتك وشاعر بي بريقا رصاص
***
أنا المستني فوق قمم السهاد لو تدري حبك في الضلوع اتربا
حباكي الفؤاد من بدري يا ريت الفؤاد ما حبا









عابرة (دافن حزني )
الحبيب


دافن حزني سبعة أراضي آسف لو ظهر في وشي
لابترضيهو لا أنا راضي يا عابـــرة العليكي علي
صابر قلبي بي أشواقو زي صبر السلم في الصي
بدل لي إبر أوراقو ياعابرة كلو عشان يفضـــــل حي
صامد في السموم يتحدى في الوادي البلا حومبي
عينو هو الخريف إتعدى ياعابرة صابر وبرضو راجي الري
ساكت والكلام مجان سكاتي ولا الكــــــلام الني
والبلقى الضيوف فرحان بليلتو ولا ضبايح طي
عابرة غناك ولف مو ميري لو دار النقاش حولي
أو غنوكي ناس من غيري لا ترمي الملامة علي
آه يا رفاعية وغاليه ماكي متل بنــــات الحي
فرقك منهن يبقالي زي فرق الضلام للضـــــي
طبعك ماهو زيف ياعابرة فايتاهن ملاحه وزي
لو شافن سناكي أماني فوق عينن يقولن ســـي
ما عشقت عيوني سواكي وين موعد رسايلك لي
عارفك وعارف الجواكي يا ريتك تعرفي البــــي
بشفق والصحاب لو نامو عارف الليل مصبر لـي
خات نار فرقتك قدامو ليه آخر علاجك كـــــي
يا ضو القمر في النقعه ما ملت رؤاك عــــيني
هايم فيكي بعد الهجعه كم تاهت خطاي في مشي
لو بقدر أطير يا عابرة ما ببخل عليــــك جنحي
في الجو العسير بالجابري أمشي الباقي بي كرعي
آه الماضي لو يرجاني كت بطوي البوارح طــي
نازح بي عطش وجداني كان ترويني قولــة آيي
بي شوقي المضارع جاي وأمرك ما مرق من إيدي
كل الماضي كان في رأيي ماهو من حقيقة في شي
ما داير أقول إشتقت خايفك مــــــا تقولي أفي
بي صبري اليبس وإتحت نار الشوق تقول جيدلي
توقد للصباح نار هادي كم شوت ياعابرة الجوانح شي
من أعماقي حزني ينادي يرجع في غناي تي تي








غريبه الدنيا و الاقدار
الحبيب
غريبة عجيبة يا دنيا وعجيبة غريبة يا أقدار
أنا المتعود الأسفار
***
أسافر في عيون واحدين بلا أعرف اساميهم
يتم الحول ونتآلف وأكون معتاد ألاقيهم
أشوف الحب وكل الحب مجسد في أحاسيسهم
ورغم الكان أفوت مجبور وأبحر في مراسيهم
أتوه من تاني في الأخطار
غريبة عجيبة يا دنيا وعجيبة غريبة يا أقدار
***
حكايتي معاك حكاية خوف من المجهول
حكاية زول يحب الناس يذوب بالحسرة للمعزول
أحاسيس زول بيحيى وحيد وفي نفسوا الأمل مكتول
خمسة سنين ينادي عليك يدق في بابك المقفول
أنا المحــتا ر
غريبة عجيبة يا دنيا وعجيبة غريبة يا أقدار
***
لحظات عابرة نتقابل ونتفرق مع الأزمان
تبقى الذكرى في القلبين ترن في عالم النسيان
أهي الأيام بتتداول صيف وخريف فرح واحزان
وبرضو الناس بتستحمل عجيب ما أغرب الإنسان
زمان متقلب الأطوار
غريبة عجيبة يا دنيا وعجيبة غريبة يا أقدار
***
عجز الديك برغم الريش عن الطيران
ومن دونن ترا الوطواط محلق في فضا الجدران
وناس محتارة بين امرين وأحلاهم هو الحرمان
وناس بتنادي من طابقين منازل شامخة في البنيان
بيوت تسخر من الأشجار
غريبة عجيبة يا دنيا وعجيبة غريبة يا أقدار
***
وحاتكم يا أعز الناس وحات الفي القلوب مشتول
حنانكم زاد عن الأوصاف وفات الواضح المعقول
وحات عينيكم الحلوين مهما المدة بينا تطول
حروفكم ناحتة في جواي دروب السوسة في القندول
حنين يقدح ضلوعي شرار
غريبة عجيبة يا دنيا وعجيبة غريبة يا أقدار
***
وحاتك يا خفيف الروح وحات الفي الضمير مدسوس
وحاتك لما أشوف عينيك بنسى الواقع المحسوس
واشوف دنيايا مابتنشاف قصور مبنية في فردوس
أعاين ليها بالإحساس وعن ذاتا النظر محبوس
خيال السارح الأفكار
غريبة عجيبة يا دنيا وعجيبة غريبة يا أقدار