عابرة (9) عصفور الصباح للشاعر الحبيب

مكتول العيون ياعابرة ** من وين دار يفتش تارو
ياكوكب سماي الضاوي ** ماغارت شهب في مدارو
كاسيهو الوقار بي حلة ** أجمل من زحل وأقمارو
..
نعود ويعود الحبيب نصمت فيصدح يترنم ويتجلي وهاهو يزيدنا من فيضه ليوقع نغماً أطربنا به الطنبور وما أروعه وهو يقول (مكتول العيون ياأماني من وين دار يفتش تارو ).
عابرة (9)
عصفور الصباح

عصفور الصباح بيغني ** لما الليل يولي ستارو
سبحان الوضع ياعابرة ** في صدر الكنار مزمارو
كم يشجيني لما يغني ** يجلي الماضي بي أسرارو
شايفك بي وضوح ياأماني ** والكل في السنين إنضارو
في موكب هوانا أبحرنا ** في زمن القدر إختارو
راقدين في أمان وغفلنا ** من ريح الفراق وإعصارو
يوم نزل العزول ساحتنا ** ما اتنبهنا لي أخطارو
ماقايلين ودادنا الصافي ** ما ح نجني غير تذكارو
مامليت يوم ذكراكي ** في درباً طويل مشوارو
كالنيل في البوادي بيجري ** يوم ماانعكس تيارو
بطراك وانتي وين ماكنتي ** لي عشق الفؤاد تكرارو
لو طيفك يطوف يغنيني ** من ليل النجوم سمارو
حر أشواقي ليك ياعابرة ** أحر من الصيام ونهارو
مترقب زمن لقياكي ** زي ساعة الآذان وافطارو
مانساني طول المدة ** مازال قلبي في إصرارو
مكتول العيون ياعابرة ** من وين دار يفتش تارو
ياكوكب سماي الضاوي ** ماغارت شهب في مدارو
كاسيهو الوقار بي حلة ** أجمل من زحل وأقمارو