عابرة 8 (عابرة عام2000) للشاعر الحبيب

عابرة 8 (عابرة عام2000)


ياعابرة عام ألفين ** راجيهو عام فوق عام
لا إتجددت لقيا ** ولا إتحققت أحلام
*****
قلبي البلاكي يتيم ** ذارف دموعو حزين
صبرتو بالأحلام ** قُت ليهو عام ألفين
حا نمشي لأمدرمان ** نسأل عيونك وين
خدَّرتو بالآمال
لوليتو لامن نام
*****
في نومو يتعبَّر ** يشهق بلا أسباب
متبشتن المسكين ** الكان قبيل أرباب
لما الزمن كان زين ** ياعابرة كنا قُراب
لا حالت الفرقة
بيناتنا لا الأيام
*****
عايش معاكي سنين ** زي الفراش والضو
مليان نشاط وحماس ** مابيرجي قولة سو
لما الفراق فرَّخ ** حلق غراب في الجو
يوماً سوادو عجيب
بدَّل ضياهو ضلام
*****
أه يا أماني هواك ** جارف كما الشلال
وقلبي الدوام مشتاق ** متكبِّد الأهوال
في يوم بداية ليل ** والقمرة دابا هلال
صوت الهدِم في القيف
قلَّع هدومو وعام
*****
بالله إتوكل ** والتاني حسن الظن
من عهدو مااتنصل ** أطريهو لو أمكن
رغم إنو كان عارف ** كل المشن ماجن
مشحون مني وأشواق
طاريك أماني دوام
*****
ياعابرة زي النيل ** بلقاكي كل إشراق
وألقاكي نص الليل ** زي نجمة في الآفاق
في بلة المنديل ** بي دمعة المشتاق
لمان تفيض وتسيل
من قمة الآلام
*****
قالوا الطمع مكروه ** إلا الطمع في الدين
خايف برايا أتوه ** طمعان أقابلك وين
رغم الزمن مشبوه ** لابد .. متلاقين
أيامنا لو طالن
ماشالن الهدام
*****
يا عابرة عام ألفين ** راجيهو عام فوق عام
وكل السنين أمواج ** مندافعي لي قدام
وزولاً مع التيار ** مابتسعفو الأقدام
لامن يلم يرتاح
ياعابرة ألف سلام
*****
إنتي الملكتي زمان ** بي رقة الإسلوب
أدمن هواك إدمان ** والليلة غالبو يتوب
ياعابرة مهما كان ** باكر بنلقي دروب
نملا البوادي قصيد
وقلب المدينة غرام