للشاعر الحبيب زهره تختلف عن جميع الازاهر

لو سألوني عن ازهارنا اجمل زهره في بستانا
يبقالي الشمس فوق دارا اجمل من شمس جيرانا
سامعين يوم براها تغني كانت غافلي ما شايفانا
واتلفتت لقينا عيونا آيه من الجمال فتانه
وانطلقت جرت قدامنا راحت ما عرفنا بكانا
الا بعد زمن لاقتني كانت بالحصل زعلانه
وريت حالي واتعزرت ما كان قلبي فيهو خيانه
دنياك بالخطر محفوفه انتي السابعي فوق اخوانا
لو لابد تشيلي فؤادي خليهو اللمسكو امانه
او اديني قلبك غيرو لو كان بالبدل قبلانه
ابتسمت تعاين لي اصفي من الحليب اسنانا
يا اخت القمر محياكي من غيرو الديار خربانه
ترباية الزهور شاغلاكي اوقات الفراغ مليانه
واسراب الفراش قايلاكي من ضمن الزهور والوانا
بيك الريف يطيب نسامو لو يغشاك قبل يغشانا
حال النسمه بينك وبينها توزيع العبير من شأنا
الله من جمال الدنيا لو نزل المطر في قرانا
ساعة قوس قزح ينشر من حلف الرزاز في سمانا
دنيا الريف بسيطه حياته ما زي المدن واحزانا
وارحم بي كتير والله مع انو الاسر تعبانه
( منقول)