فاطني ام حجل للشاعر الحبيب

من الحب ماقتل ومن الحب ما أحيا فهاهو صديقنا الحبيب يعيش علي هذا الحب يتذكر مراتع الصبا ويعتذر منها علي التفريط فيما حبتهم من حنو مجمال بفضل حب مات شهيداً للأعراف والتقاليد فأين منه ذياك الحبيب أين منه تاريخ مضي أين منه الغائب في صمت الزمان

ياراتي لي حالي وحنين ***** وديني لي فاطني أم حجل ألقاها وين ؟
*********
زينة البنات دون إعتراض
حزنان عليك أحزان رياض
البوم علي أشجارا .. باض
صيحاتو أفزعت الصباح ***** الفجرو ماداير يبين
**********
كم رش فوق وادينا غيم
وأيامنا كانت في نعيم
والليلي من غيرك جحيم
ختيت وراي ظلم الحسن ***** وجاييكي بي ظلم الحسين
********
جاييكي يادخري الغلابة المتعبين
جاييكي لو يزلق خطاي عرق الجبين
جاييكي ليكي علي ......... دين
جاييكي ياام درباً صعب ***** يالإنتي مرقة من متين
*********
حبيتك البارح براي
عزالي ماكانت معاي
كم ردد العشاق غناي
وأطلقنا لأفراحنا العنان ***** زي قمري في غابة مدين
*********
نغشاها بدري مع الصباح
ما كنا نشعر بي الرواح
لحظات من اللهو المباح
ترفعني فوق نجم السعد ***** تفرج هموم قلبي الحزين
********
آمالي وأحلامي الزمان
عاشت بلا تحديد مكان
حسب الهوي البيناتنا كان
حسب المشاعر الإنطوت ***** جوانا والحزن الدفين
*********
كانت سحابة صيف مشت
مرت سريع ماطولت
زي الشتا الشمسو انتكت
خلتني لي ليلو الطويل ***** أقضيهو في البكا والأنين
**********
سامحني يامأواي والمرسي الأمين
سامحني يامرتع صبانا أنا وكنين
جاييكا شايل الماضي في قلبي الحزين
أفسح لي فوق أرضك مكان ***** وأديني خيمة لاجئين