الســــــنين ــــــــــ للشاعر الحســــينابي

السنين بي خيرا عدت والزمن دولابو داير
العمير تلتينو راحن في المشاوير والدرادر
لسه في أعماقي صورتك يوم بقيت منك مسافر
المعاني الفي حديثك قصة مالاقيلها آخر
رغم طول المده منك لسة فيها بعيد وأذاكر
* * *
يابا لاتهمل عقابك الجهل شيطانو كافر
يابا لاتطش من بلدنا إنت ماك قدر البنادر
نحن ما مابين سعادتك إلا ماك قدر البنادر
الدريب العاجبك أسع ليك يوم تاباه باكر
* * *
الكلام كان كلو حكمة داير اصدق وماني قادر
إلا شايف المتلي سافر والقعاد باقيلي عاثر
ود فلان ماقبلي سافر وجانا يوم الليلي تاجر
اللجرب حظي يمة يبقي بكره اجيكي ظافر
سهليلي اللبقي مارق برضي زيك إلا صابر
والفراق مهما يطول كل اول ليه اخر
قمت شايل زادي منك وفوق دروب العيشي سادر
ترقص الاحلام تزغرد والقليب بالفرحه عامر
ماني عارف الدنيا قاسية لابتجامل لابتخاطر
ياما ضقت وراك مره مره ابكي ومره اساهر
* * *
يا البراك اخترت دربك وقلت ماك داير الوصيي
كان مصيرك يوم تفارق تبقي للاحزان تكيي
* * *
الزمن ما بيرتي يمة وكم خلف فوق قلبي كيي
ديل سبوعين من فراقك وقت اعد القاها ميي
المعيشي الفي البنادر ماها ذي عيشتك هنيي
الملاح الفي بلدكم بالقدح هني بالوقيي
الرغيفي بلا المسلي مره يابسي ومره نيي
خفت من خمج المداين ومن نفوس بالشر سخيي
ومن وجوه ما ذي وجوهكم قانعي بالقسمة ورضيي
ناس تشحد وناس تهدد وناس عديل عينن قويي
ونوع يجيك نافش شعيفتو لاهو راجل لو بنيي
ونوع يختف الزول معاهو عنيي ذي ختف الحديي
رغم كل الحال ده يمة يضحكو إن قلنالن ايي
لا لا مابقدر وحاتك والقعاد جنب ديل بليي
تاني راجع لي دريبك وماني سائل في البقيي

اصلي مشتاق لي بلدنا وشوقا ياذي الزول اذيي
للبنيات البساسقن للورود نازلات عشيي
وللرواويس البجوك شاقين صدور الموج هويي
لي حروفنا ولي جروفنا ولي محيميد والرضيي
ديل مواعيدن رسائل ونحن موعدنا الضحيي