ياغريب ــــــــ للشاعر بابكر محمد خير

ياغريب
كفكف دموعك ياغريب لاتبكى طول الابتعاد
واصلو المعايش ياحبيب فى سبيلا يمشوا الناس بعاد
داير شنو وداير معاك منو اليحس ألم السهاد
لوكان بكاك يجيب جواب ياحبى كان نطق الجماد
مالك قليبك حنه ليه والله العمير تاوقتو زاد
أصبر على المكتوب عليك والبيك بيه المولى راد
مايى ده كل الناس معاك منتشرى فى كل البلاد
ومايى ده كل الناس سواك فى الغربة راجاهو الحصاد
هما نزل فوقنا وقعد لوغيرنا منو شرد شراد
ولوفوق جبل ثابت متين كان اندثر وأصبح رماد
الفوقنا راقد شى تقيل ماتشيلو لو أعتى الجياد
خلانا نتململ انين وصبرنا ماشى على نفاد
ياحليلنا من ناسنا الحنان فى القرية والحب والوداد
وياحليلنا من حن القريب حبوبة والناس السعاد
ليه يازمن سوينا ايه لليلى دوبنا بطان ولاد
مسجونة فينا حزم سنين عشناها كل يوم فأزدياد
تكبر معاناتنا وتزيد مانحن للاحزان سماد
وقدرنا طول الاغتراب ده كانه دين واجب السداد
آه يازمن مالك علينا أحلامنا كاسيها السواد
أضنيتنا من كتر العذاب ختيتا فوقنا سنين شداد
مشتاق كتير لى ناس عزاز شوقا بيمرق روحى كاد
راجيها تتحل القيود وينادى للرجعة المناد
يابلدى باوطن الجدود أنا عشمى أرجع أجيك صاد
وان مارجع حبك معاى يرقد مكان يبقى الرقاد
**************
هذه القصيدة كتبتها حديثا وكتبتها بلحظتها وأهديها للعم العزيز والمربى الفاضل الأستاذ يوسف أحمدحسين محمد كما وأهديها لكل الحيارى والمتعبين من المغتربين وأخيرا وليس آخرا أهديها لأعضاء وزوار منتدى التوثيق الشامل الذى لولاه لما رأت هذه القصيدة النور ؛؛؛ وتحياتى وسلامى للجميع