طاحونة محمد محمد خير

الساده بني دهمش سلام:_
من منا لايعرف طاحونة محمد محمد خير .
هذه الطاحونه قدمت خدمات جليله وعظيمه لأهل الحسيناب والقري المجاوره ، وكان الناس يأتون إليها من كل حدب وصوب عشان (يدققو)فيها عيشن .
وأذكر لما تكون الطاحونه علي كنت أمش من بدري وأخت أكياس العيش جم الباب لغاية ما يجي عمك (سواق الطاحونه)وأذكر من السواقين اللذين تعاقبو علي الطاحونه عمنا إبراهيم من ناس الجابريه وجاء بعده ولده التاج إبراهيم ثم حسن سعيد من الشخبراب وعبيد عبد المجيد .
ولن أنسي شجرة اللبخ القدام الطاحونه ، كانت فيها سماحة ضل والعجب الأزيار مويتها باااااارده..
وبعد مايجي السواق يفتح الباب يطالب الجميع بالإنضباط ، الزول الجا أول يخت كيسو أول وهكذا الأول ثم التاني __الخ.
ثم هناك صفان للأكياس واحد حق القمح والتاني حق المريق (الذره).
وياويلك وسواد ليلك لو دققت القمح بعد المريق طوالي .
الموضوع ده داير ليهو قعده.
السؤال هو:_
*متي تم تأسيس هذه الطاحونه؟
‏*من هو أول سواق لها؟
وعلي مرافئ الشموخ نلتقي

مني عجل يا مريسيل -- السلام طبق اللوم قليل --لي حبيب بنوت امو ديل --- قولو تومه بقت تريبيل.......!!!
سلام الله يا مصعب كامل
البلد ديك ما فيها محل جبابيد.....؟؟ قربتو انشاء الله..
الحقيقة هي طاحونة (حُمّدخير ) اسسها بعيد عودته من الجزيره تقريباً سنة 1970 وكان مقرها الدكانين الواقعين غرب بيت عمنا عبدالمطلب (القديم)وشمال بيت عبدالرحمن طلب (بيت عمنا طلب الجديد و فيه توفي)و جنوب بيت الرضيىو عبدالباسط وغربها ميدان ثم درب السوق..الدكانين ملتصقين يمتدان من الشرق للغرب...وخلفهما (سبيقة صغيرة مكسرة).كانت الطاحونة في الدكان الغربي..و وكان حوض التبريد ملتصق بالحائط الغربي من هذا الدكان و كان يملاه كل صباح و مساء المرحوم(محمد نور صباحي)مقابل (قرش للجوز) ثم زاد الي قرشين ثم شلن بعد وفاة المرحوم محمد نور سنة 1972 كان يملا الجوز الاول من بير المسيد و ويعبر من الباب الشرقي لبيت ابوي موسي و يخرج من الباب الغربي الي الطاحونة ثم يواصل ملأ الحوض من بير ابوي عبد الباقي...اول سواق ان تسعفني الذاكرة كان من الجابرية و (اضانو تقيلي)مشلخ ....اخضراللون ... اصلع ...يسمي عبد الوهاب...ثم جاء بعده محمد البادرابي من دبني ثم ميرغني البادرابي في فترات متقطعة..و استمر الحال هكذا حتى وفاة عمنا محمد خيرسنة 1974 تقريباً..ثم توقف نشاطها بينما افتتح الدكان الشرقي كدكان يديره محمد محمد خير .. فيه خزانة بها مستندات المشروع و قروشه..و في÷ اجتمع الناس و جمعوا التبرعلت لبنا الشفخانة...و فيه ادخل اول خط تلفون سلكي.. ثم نقل الدكان و افتتح المرحوم محمد محمدخير الطاحونة الجديدة في اوائل الثمانينات غرب درب السوق و جنوب شرق العيادة..و اثر فيضان1988 رحلت الحلة كلها للمكان الحالي وقرأ الرجل حاجة الناس للطاحونة و اعاد نشاطها سنه 1990 في المكان الذي تعنيه... و اعتقد ان السواق اسمه (عبدالله) و ليس ابراهيم ... و قد يفيدنا بابكر بمعلومات اكثر دقة .....(سنة 70/71 حاولنا انا و علام مع قلة حيلتنا ان نقتحم احتكار محمدنور لموية التبريد و فاتحنا عمنا محمد خير و ووصلت الاخبار للمرحوم محمد نور فصار يحصبنا بالحصي كلما وجدنا قرب الطاحونة و كان ان اصيب علام في ساقه باحدى تلك الحصايات الملعونة فانقطعنا عنها..) قروش حوض التبريد هذه كان من آثارها ان علمت معظم اطفال القرية (سف التمباك) فحيثما احتجت للقروش ما عليك الا ان تفرغ في الحوض اي عدد من جيزان الما ثم تستلم المقابل... و في الجانب الشرقي كان الصعوط يتوسط شلة الانس في علبة المونيوم تفوح رائحتها النفاذة و الفتيان يتبارأون ايهم اشد تحملاً لوضع سفة و صعوط التنافس هذا كان يقدمه عمنا احمد مجاناً حتي اذا تمكن منك الكيف انقطع المد المجاني و ارشدت الي مكان القروش ....جوز ..جوزين و تشتري تمباكك الخاص...!!!...الصادق ..عوض..ختم/..الجزولي...الخ....الخ.
مع تحياتي لكم جميعاً.. وشكراً لدغدغة الذاكرة الخربة بمثل هذه التفاصيل...

حوض التبريد كان حجمه تقريباً 6 امتار مكعبة (مترين×مترين×مترين) من الطوب و الاسمنت و لم يستطع شخص ملأه قط و لا اذكر انني رأيته ممتلئ..لذلك كان مصدر دخل لا باس به يغنيك عن استجداء قروش الجبابيد و التمباك و السجار للذين يتعاطونه سرا... وقد ظل هذا الحوض صامداً حتي قبيل الفيضان و لا ادري كيف آل بعد ذلك الي زوال...

الاخوة الاعزاء سلام
كلام زي الورد
الاستاذ الحسينابي ننتظر منك الكثير لتخرجه فلاتبخل علينا وعلي المنتدي بمثل هذه المعلومات ، كما انه نحن في انتظار قصص "حمارة ابوي موسي" و"كلبة المامون" و"تيس السرة اذا امكن" وكل القصص من هذا القبيل


خالص تحياتي

الخال الحسينابي سلمات

اشكرك جدا علي المعلومات المفيدة وياريت تواصل و تجاوب لينا علي باقي
الاسئله .
تعريجه :
يا خال الحقنا بي شجرة النسب

الدكان الواقع شرق الطاحونة (دكان ود حمد خير) لم يكن دكاناً فقط...بل كان مؤسسة بكل مضامين العبارة..مكان صلح..مكان اجتماعات..وجلسات لجان المشروع ..مكان التلفون..اول تلفون بالقرية..مكان تجمع ناس السوق ب(ذلك البص الكومر المكتوب علي بابه الامامي الشمال( كهيعص )و حتي يوم بيعه و استبداله بالبرينسة لم نستطع قراءة تلك العبارة و لا فهم معناها..!!و لا يكون الدكان ذلك دكاناً الا في غياب (ودحمدخير) فانا اطلقت عبارة يديره تلك لتوضيح مكانة ا
ذلك المكان وضجيجه بالحياة اولاً ولان السؤال ورد عن الطاحونة ثانياً ثم ان الطاحونة كانت تحت لي درب السوق و ليست فوق ليهو..
الشى دا منتدي ولا مسيد الزول تبلعوا كلاموا يا بابكر...؟؟؟
واول سواق للطاحونة ياهو عبدالوهاب و لا انا كضب...؟؟
مع اشواقئ لكم و انتظاري للغرد!!!!








زز

العم والخال الهمباتي الحسينابي سلام:_
كيف حالك بعد في هذا العالم العريض ، نسأله تعالي أن تكون موفور الصحه والعافيه وكل الأمور رايقه.
أطمنك البلد دي مليانه جبابيد وياريت لو شرفتنا ، حكمة الله البلد دي ملياني سمك وكمان أبو الرخا بس ماهو طاعم زي سمك سوبا داك.
أشكرك جدا علي توضيح هذه الحقائق عن طاحونه حمد خير فأنت ملك التوثيق .
لكن الشئ المحيرني الناس دي تشيل وتتعب تملأ حوض الجن ده كلو بس عشان كيس صعوط!!
وبخصوص سواق الطاحونه كلامك صحيح الزول إسمو عبدالله وليس إبراهيم..نحي هذه الذاكره المتقده والأسلوب السلس في الكتابه .
وأخيرا منتظرين منك الكثير
ودمت في حفظ الله ورعايته

الحسينابي وبابكر
ســـــلام

عندي سؤال : تري ما هو هذا "الغرد"

الاعضاء : لكم أن تتخيلوا ضحكة الحسينابي في آخر النص "زز"

*العم والخال الهمباتي الحسينابي
‏*الأخ بابكر ود حمد خير الأنصاري
‏*الأخ ود الخاله عمار
‏*الأخ ود الخاله أبو احميد
السلام عليكم
أشكركم جزيل الشكر علي مداخلاتكم القيمه والجميله جدا والتي إن دلت علي شئ إنما تدل علي حرصكم الكبير علي تدوين تراث هذه البقعه المباركه والحبيبه جدا إلي نفوسنا (الحسيناب).
وإنه لمن دواعي غبطتي وسروري أن يقوم بالرد علي تساؤلاتنا هذه والتي أردت من خلالها التعرف أكثر علي كنه وأسرار معالم كان لها ومازال حيز في ذاكرتنا ، أساتذه كبار من أمثالكم.
فلكم الشكر الجزيل
ودمتم سالمين

مصعب بتعرف غسيل الطاحونة ولا نسيتو....لك وللجميع الود وما تتقطعوا من زي دا...