شهاده عربيه

ليكى ولى زمانك يمه يبقالك درس يا بنيه
اخديهن عبر كان عاقله يعدلن من خطاك شويه
الناس ماها زى ما فاكره ولا زى اسطوانتك ديه
تقيسى الناس دى بالمصروف وبى لبساته والعربيه
موبايلاتك اخر صيحه برضك ماش تمسكلى ليه
جلساتك لذيذه وسمحه ضحكاتك عديله عليه
طلاتك بيض ما مريه ونساتك عزيزه نديه
لكن يوم تلاقى الغيرى جيبا لى صبيطو تكيه
يغريك بى قروشو وجاهو يوم داك دار تشختى ليه..!

انتى اظنو ما قروك ما عرفتى المعانى الفيه
سودانى ومؤصله فينى لو فيك خصله من الفيه
انا اقليمى اتربيت مع الواسوق والسبروقه والطوريه
شلت اصاله اجدادى وحبوبه بتحجى ليه
شربت كرامتى من النيل تسمعى دويهو فى الجابريه
وما بينات تميراتنا الشموخ والعزه محريه
اريتك لو تكونى فهمت يا بت يا سعوديه
لكنك كمان معزوره مانت شهاده عربيه

ليكى ولى زمانك والزمان جوار
دولاب الزمن بيوزع الادوار
ما هى السعاده قروش بيت ملكى ولا ايجار
لكن وفا واخلاص تحفظ حقوق الجار
ويكونوا متفاهمين ولو حد فيهم جار
ما يغلطو الاثنين والعيشه بينم نار
ويراعو حق الدين ولو كانو متخاصمين
ما يبقو منفصلين ولا حتى فى النيه

ليك ولى زمانك شيخه العاشقين
ما يغرك جمالك والبلاك قاعدين
او حنك ودلالك يبقى للشاريين
الود لو هو جالك واسالى العارفين
وكت الجد بدور زولتة حياها الدين
وينك يا بدور ماكنت حوريه
راح حتى الجمال فات بالمعديه

يا ابن النقر سلامات
والله شوقتنا لرؤية الجديد من كتاباتك
اكتب لينا شهادة عربيه وغيرها والقديم لا تنساهو
ولك الود والتقدير