مالو تمرنا خلا الشيل

يا الشدرة المثيلك ما في
يا نبع الحنان الصافي
يا الصبرك حكولنا عليهو
قالوا لينا عنو خرافي
يا الحبل الفضل بيناتنا
بين أرض الكرام اسلافي
جيت بعد السنين مشتاق
ما لقيت العزاز أهلك
وأنت كمان لقيتك ما في
من شبينا في ضُلك
تطرحي من ثمارك لينا
ونشرب من زلالنا الصافي
حتى بحرنا ما لا قيهو
بدلو بشوف زلط ممدود
رمال حارساه مد الشوف
وينو بحرنا وين ودوك ما معروف
اطالع في الوجوه من جيت
داير زول يعرف السر
ويحكي لي عليكم! ما في
اذا كان الرواية صحيحة
والقالوه لي حصل
بانو بحرنا مرة طغى
هاج وعليكم اتجبر
لا راعي الوداد والعشره
لازي اهلو سوى الستره
خلاهم يروحوا بعيد
وعنو يفضلوا الصحراء
لكن كيف عليهم هان؟
يخلوك بي وراهم كان!
كت داير الومك ليهم
لقيتهم هم يلومو فيك
قالوا لي ماك عارف
دي ما التمره القبيل شفناها
مواعيد السليل خالفاهو
حتى كمان أوان الشيل
وشن من شيل؟
المطموره خضره وعامره
تطرّيك الزمان الفات
يوم حش التمر تلقاها
ما تديك غير كيلات
وهادا الحال عليهن جملة
كان بركاوي وكان جاوات
حتى سبايق القنديل
بقيت محتار وما عارف
وكايس في الأمر هداي
وآخر شيء نزلت براي
وفي الكُرشة الورا الفرحاب
وقفت هناك
الأمية ما لقيتها
لكن فضلن خلفات
تكيت اضني على واحدة
وسألتها بي خصوصية
وقالت لي كلامن
ما بعرفوا الناس
قالت لي: أي وي اه
عجب يا دنيا فيك نشوف
شن قالوا؟!
قالوا تمرنا خلا الشيل
عاد والله ما حاسنبو
كيف بنشيل؟ وما لنا نشيل
نحنا كمان فقدنا كبير
غنوات بت عبيد
الكان بتطربنا
شمال ويمين معاها نميل
صباحاتها العلينا بُيض
شخيب لبنا التقسم فيهو
وزينا كنا زي جاراتها
تصابحنا وتماسينا
تفقد الوالقفة بين اخواتها والما في
حنينه علينا قلبها زي حليب صافي
زيها كم فقدنا كتير
عجب يا دنيا
وجايين قال يلومونا
ما لنا نشيل؟
وكيف بنشيل؟
ونحنا الليل نقضي سهر
قلوبنا مزعزعات بالخوف
فقدنا الحاج ودعواتو
فقدنا صلاتو نص الليل
فقدنا الراتب الفجراوي
يملأ قلوبنا بركة عديل
فقدنا الكان تحتنا يقيف
يوم حش التمر بلهول
يمرق في البداية زكاتو
يمرق منو تاني كرامتو
للغاشين وللماشين
يضوق أهلنا والعربان
يقسّم ما بيفرز زول
إنتو منو؟. وتعرفوا شنو؟
وتحصدو ليه؟!
منو الفيكم حفر
حوراتنا في الرملة
منو الشال جوزو
شان يسقينا عز الصيف
منو الختانا في الحفره
وبسم الله قال"
إن شاء الله للغاشين
وللماشين وللدناع
وللسراق كمان عافين
حتى الزرعو ابواتكم
ومنو اختارو خلو (سبيل)
جنيتو عليهو حشيتوهو
ودايرين برضو نحن نشيل
وكت صابرين عليكم نحنا
دايرين تشتكونا انت
عجب والله يا دنيا
ونقول لكم (الفراغ ليكم)
كان ما قلنا (يا ما يلين)
عبدالعظيم محمد سيد أحمد

الاخت الاء سلامات
التحايا للعم والخال عبدالعظيم
ياهو حال البلد صبحت ناشفي ومن المترات الفوق لاعند البحر مافيها شئ يطمن غير الشوك والسنط والطرفي والحلفي وعيدان التمر الناشفي والتمر المحرق ،حتي الطير مالاقي تمره يسوي عشو فيها جا سكن في البوت الفوق لانها اغلبها فاضية
والله يسهل مع الناس البدل تخدر تنشف .وجالون الجاز بي شي خرافي ويجو يقلعوا منهم حصادهم في تقاتو وتمرن من قبل يصل الحوش
والله مع الغلابي
الاخت الاء ارجو ان تكتبي اكثر واكثر من اشاعر استاذنا عبدالعظيم

لك كل الاحترام
عبدالرحيم محمدنور

سلام يا عبد الرحيم
فعلا البلد حالها بقي صعب لكن اكيد في امل ونحنا بي يدنا الكتير بس كيف الناس تتحرك وان شاء الله اكتب من شعر الوالد الكثير