في رثاء الراحل محمد علي عبدالماجد

من طرف Omer M.Ahmed الأحد أبريل 11, 2010 6:18 pm

في رثاء المغفور له بإذن الله تعالى

محمد علي عبدالماجد

للشاعر عبدالعظيم محمد سيدأحمد

زي الطيف العابر مرَّ
زولاً ما اتلوم بي شين
من شفناه نشيط ومفرهد
جسمو سليم ما شكا يوم عله
لا في مشفى رقد اسبوع
عشان الناس توفيهو الدّيَن
لا ارحامو الديمه معاهم
حصلو حتى يقولو وداع
قنعان تب من جزا في الدنيا
داير حقو يكون بعدين
حُمد علي كان زولاً مسكين
والله مساكين نحن ومغشوشين
حُمد علي عارف قيمة الدنيا
وعارف أصلاً حدها وين
عاشقاً صادق في الطار يرقص
منه يفترو المداحين
صافي ويضحك من اعماقو
وأبيض قلبو وخالي ضغين
عارف الفانية عماره خراب
لا قدم في خطة اسكان
لا ساسق لا قابل لجنة
لا يوم فكر في أورنيق
قاطع شكو بكل يقين
انو حقوقهم ما بتضيع
وقطعتو كان محفوظة هناك
في ضل الجبل الممدود
قطعة الدرجة الأولى مميزة
في حي الزهاد والصالحين
يوم الناس في الدافنة اتلمت
والضل ما شال الناس واقفين
احسبو صفوفكم
عشرة حداشر عييييييييك ماشين
يومُن داك الناس عرفوك
ولي ناس كان معروف الحال
وفي الأمثال من بدري بقولو
أصل النخله ما بكون تفله
وأصل الجنى في الواقع خال