هون عليك

من طرف Omer M.Ahmed الأحد أبريل 11, 2010 6:03 pm

هون عليك للشاعر عبدالعظيم محمد سيداحمد

يا لوحة في محراب غناي
وكت القمر
يسحب شعاعو من الاسي
ويرسل مع اخر خيوط النور حروف
فيها بيقول:
،،هون عليك،،
انا شاهد العصر الوحيد
سامرت قبلك ناس جميل
وابكاني قيس بي لوعتو
واحترت في اشعار كثير
لكني ما اتوقعت في الزمن الاخير
تسهر عيون بالريد عديل
وتفوق قلوب في صدقها
الناس القبيل
يا قبلة اوتاري وغناي
وكت النجوم تتعب معاي
ترحل تغيب
ارجع براي
واناجي طيفك في الخيال
وانسج من الامل الخيوط
واجمع حروف المستحيل
وازرع زهور فوق الرمال
اتمني لو تصبح جروف
وابث ضراعاتي ومناي
وبدون ميعاد القاك جيت
مافي الخيال واقع عديل
القاك قدامي بتقيف
واشوفك انت عيان بيان
واكاد من الافراح اطير
ارمي الخيوط الفي يدي
واجدع حروف المستحيل
تتزاحم الكلمات عليك
حمد الله الف علي الرجوع
حمد الله بي شوفتك كمان
وسؤال يسابق في سؤال
خليتني ليه؟
سافرت وين؟
كيفن رضيت طول الغياب؟
ولا القدر مكتوب عليك؟
ما عرفت عنوان ليك انا
وما قدرت اسال زول عليك
وقبال ابل الشوق معاك
قبال اوريك الحصل
ومن غير وداع
تنقل خطاك عني وتروح
واسرع وراك
وامد ايدي بلا حدود
وتسرح عيوني معاك بعيد
وما بين فرح ممزوج بخوف
تلقاني زي مجنون اقيف
يا حسرة آه
ما كت قايل انو طيف
يا حسرة آه
ماكت قايل انو طيف