مرحب حبابكم

من طرف Omer M.Ahmed الأحد أبريل 11, 2010 5:54 pm

مرحب حبابكم
للشاعر عبد العظيم محمد

مرحب حبابكم بالالف
الليلة شرفتو البلد
وحلتنا عمرت زي زمان
فرحتنا لا حد لا وصف
الانتخابات من زمان
موسم فرح لاهلنا ديل
أول تبادي نشوف صور
مرسومة بي رسماً سمح
والفيها ذاتهم ناس نضاف
ما زينا... يدونا ليها بلا قروش
في الفترة دي
أولادنا في الخرتوم يجو
واحدين يجونا من الصعيد
والحاج حمد
إتمدَّ في كرسيه انجبد
واخذ نفس.. نفساً عميق
واخدلو ضحكة ملونة
وبرم الشنب زي التقول
داير يملأ ساعتو أم زمبرك
ونادى الولد
قوم يا ولد
نادي لي خالك ود سعد
وكلم أعمامك كمان
وجيب الخروف الكان موقف
لي سماية بنت أخوك
الجونا ديل ناساً عزاز
بالساهلة ما بتشافو تب
ورجع يطايب في الضيوف
شرفتو يا ناس البلد..
والله ما قايلنكم طارننا
والبيت دا ذاتو عرفتو كيف!؟
الحِلَّة باقي ارتحلت
في سنة ثمانين رحلنا من الرمال
وبعد ثمانية سنين كمان
جانا البحر...
هدم البيوت شال البراسيم
والشتول ما خلا شيء...
ما اظنكم لاقين خبر
مرحب حبابكم بالألف
والرحلو في الفانية مننا
ناس كُتار
حاج ود عمر أولاد سعيد
أولاد حسين أولاد يس
حمد خيراب ناس ود فضل
أصلو "الكُبدان"
ما يكون جاكم هناك
الزيكم ما بقصروا
على كل حال ما مشكلة
والليلة انتو ضيوفنا عاد
من قمنا ما زعلنا زول
أصواتنا مبروكات عليكم
اتقاسموهن بين بعض
مرحب حبابكم بالألف
أما المطالب ما في شيء
بس في الوداع ليكم نقول
حكامنا جملة بلا فرز
إن شاء الله من الإنجليز
البينا بينكم ينكشف
يصفى الحساب بيناتنا تب
يوم نحنا وانتو نقيف سوا
عند حاكماً حاشاه
لا جار لا ظلم
الساعة ديك
كل زول حسابو بيتعرف
مرحب حبابكم بالألف..