من وين انتو

من طرف Omer M.Ahmed الخميس أبريل 01, 2010 5:44 pm

بتسأل قلت من وين نحنا
من بلدا بعيد بالحيل
قبل الدنينا تزلط وتسفلت
كنا نشيل زوادتنا
وعلي ضهر اللواري نقوم
وفي عز الهجير والصيف
كان ضل اتلشمس يسترنا
لمن تب نلاقي الليل
وكان ختت العوارض كنا
تالت يوم ندخل الحلة
في بلدا هناك بعيد
مكانا تلقي فيهو النيل
من طول المسافه عليه
اخد وقفه واخد لفة
وفكر انو يرجع تاني
هناك علي الضفاف
تلقاها حله صغيره
شكلها غير
مميزة في شكل ناسا
مميزة في بويتاتها
هذه الحله حالها عجيب
ميلاد ناسا يوت مجهول
كان شاعر وكان فارس
وكان دكتور
او شيخا طريقو عديل
يقوم تلقاهو بي توب الظلام ملفوف
يسمو سماينو بالقمره
وزينا زي خلايق الله
بنعرف الريد ونهوي كتير
وصادقين في مشاعرنا
شيوخنا شيوخ تدلي كتابا بالترتيل
يمدحوا للرسول الغالي
مدحا مالقيتلو مثيل
شبابناوعزاز وفنانين
يجيدوا اوصاف حسان الريل
لكن وين؟!
لامدحاتنا لاغنواتنا لاونساتنا
مابتعده درب السوق
لايوم زول
كتبلو قصيده في جرنال
لاصوت زول من اولادنا
بيغلط يوم يجيبوا الرادي زي غيرنا
ولا الشاشه التجيب الناس
صغار وكبار
جابت يوم صورنا هناك
كان في مدحه او في ونسه او في غير
ميلاد ناسنا غير معلن
سفرنا وهمنا وافراحنا
كلها في ظلام الليل
تموت الفرحه في قلوب الرجال بالمغسه
وامالنال وحجا الامات وغنواتننا
تشيلها تروح نسايم الليل
تدور ايام حكومات تمشي
واحدات جايه
ديل مكن وين وديل من وين؟
نحن هناك تحت ستر الله
لازولا بقالنا وزير
ولا حاكم علي اقليم
ونحمد ربنا وشاكرين