في رثاء الراحل عبدالله محمد خير _____للشاعر عبدالعظيم محمد سيداحمد

من طرف Omer M.Ahmed الخميس أبريل 01, 2010 4:51 pm

في حس الدليب الدق
في الليل في الصدي الراجع
فقدتك مالقيتك جيت
مع جينياتنا
فوق طرف البحر واقفين
جسروا المويه مالقيتك
وصوتك ماسمعتو هناك
مع ناس الفزع بي فوق
مساهر وين وغنيت وين
وكيفن غبت يابدر السماء الساطع
مشاويرن كتير راجاك
وافراح ناس كتير حارساك
وناسا بي تحت قاعدين
يسآلو عليك
مشيت بي وين
جزيرتنا بتفتش فيك
شتيلاتها وشديراتها
ويبكيك تشقه وهكرة
دموعها تسيل عليك حزنانه
من بعد النجيفي خلاص
كيف تمسك حبال صبرا
منو البعدك مع الاسراب
يغرد لينا شان اسم الككر يعلا
قبلك ياهو دا الدرويش
نفض ايديهو واتبرا
حتي القوز وكل رايعاتو تب نكرا
ابوك يافدوي مابنكيه
مشوار الفرح جواهو
ماقدر المرض ينهيه
جسورا زي اسود الغاب
شايل جرحو في خاطرو
وينزف حرحو في رجليه
لا يوم خلا حفلاتنا
لا غاب من جنازاتنا
لا يوم قال مشاويركم
بعيده عليهو خلوهو
ود عابدون حليلك
كت تقابه فرح موقودة
لا كليت ولا مليت
طعم الموت تلوك فيهو
سنين وسنين
وبرضو تغني ماهماك
بس داير فرحنا يدوم
التوفيق نقر بوريهو
راجنك تودع ناسو
عشان شعرك
يشيلو زوادة بيهو يغنوا
ينسوا الهم معاك فترة
وما عرفوك مشيت بي وين
وكيفن غبت
يابدر السماء الساطع
سألت عليك قالو لي رجعت الغربه
تاني براك
شن وداك
ما قايلك مشيت وتاني ماك راجع
حكم السيد نفذ يالزين
نحمد ربنا وراضين
نهاية الرحله والابداع
وصلتو خلاص
يا الصاري الوقف شامخ
يصد الريح شمال ويمين
يقاوم الموجه مهما تكون
والهدام حفر تالاك
من كل جيهه
وانت تزيد ثبات ويقين
معاك سلامه يا الشاعر
عزانا الذكري في سيرتك
عزانا اخوانك الواقفين